Hilig ko ang duwang bowling. Kini ang paborito kong sports. Kasagaran, sa YMCA ko moduwa’g bowling kauban sa akong officemate nga si Ester. Managsama kaming nadestino sa Account-ing department. Ampay sab ni Ester ang duwang bowling.
"Asa man ta gikan dinhi, Belinda?"
Mao pay pagkahuman namo’g duwa ni Ester og bowling niadtong tungora sa YMCA. Nanarapo kami sa singot sa among nawong sa tualya. Sayo pa ang gabii. Usa ra ka oras ang among pagduwa ni Ester. Gikan pod sa opisina, midiretso kami sa YMCA. Nagdala kami daan og sports wear sa pagsulod namo sa opisina ganinang buntag.
"Manihapon lang tang daan sa fastfood una ta mamauli," tubag ko.
Ug mao kadto. Nangaon kami sa fastfood nga walking distance lang gikan sa YMCA. Namatikdan nako nga nagmagul-anon si Ester samtang nangaon kami. Wa siya’y timik.
"Anything wrong, Ester?'
"Wa na kami si Gerald."
"Ngano man?" Daw di ko makatuo sa gisulti ni Ester. Nasayod ko nga loving kaayo sila sa usa’g usa. Sobra na sa tuig sa ilang relasyon. Nakaila ko kang Gerald kay gipaila man kini ni Ester kanako.Nag-opisina sab ang lalaki sa usa ka Advertising Agency.
"Wa gyud ko magdahom, Belinda, nga ingon diay ana si Gerald. Laki kaayo siyang tan-awon ingon man ang iyang sinultihan ug lihokan. Pero diay..."
May gihunghong si Ester kanako. Nakalitan ko.Ug wa ko kapugngi ang pagkatawa og kusog. Usa ka bayot si Gerald? Nahikatawa na lang sab si Ester.
Morag wa lang kang Ester ang nahitabo sa ilang relasyon ni Gerald. Daw dali ra siyang naka-adjust. Kadyot ra ang gibati niyang kasakit. Ug nakita ko sa duha ko ka mga mata ang gitug-an ni Ester kanako. Gikan ako niadto sa Gaisano Main, nag-grocery ko kay bag-o kong suweldo. Dalaga pa man ko, miabag ko sa akong mga ginikanan sa mga kunsumo sa balay. Nakapanglingo ko, bayot na gyod kaayong tan-awon si Gerald.
Duna siya’y kuyog nga guwapong lalaki, naglakaw sila sa Colon. Nagkuptanay pa sila sa kamot. Nahimuot kaayo ko sa akong nakita. Puwerteng nagpaikid si Gerald sa iyang linaktan.
Nagpadayon kami pagduwa’g bowling si Ester sa YMCA kun gusto namo. Hangtod nga gikaila namo ni Ester sa YMCA si Donato ug Alfred. Nagduwa sab sila’g bowling. Pulos guwapo ang duha ka lalaki. Mga ulitawo pa usab, ug labaw sa tanan, dunay maayong trabaho kay mga propesyonal usab.
"Sa unang higayon, Belinda, nagmahal ko. Kanang pagmahal nga tinud-anay gyod."
Nanuroy kami si Donato niadtong tungora sa siyudad, wa kami trabaho kay adlaw nga Domingo.
"Kinsa mang bayhana, Don?" Gikulbaan ko. Sa unang higayon, mibati sab ko og gugma.
"Ikaw, Belinda. Ikaw ang babaye nga gusto kong pakaslan kay akong gimahal."
Gisugot ko si Donato. Ug nasayran nako nga nagkarelasyon sab si Ester ug Alfred. Hangtod nga naminyo kami si Donato, si Ester ug Alfred nagpakasal usab.Ug bisan pulos na kami minyo, nagpadayon usab ang among pagduwa og bowling sa YMCA. Kaniadto kami rang duha si Ester,pero karon upat na kami kay kauban na man namo sa pagduwa si Donato ug Alfred. (Kataposan)