Anino sa kulto - Gula 171

Gimandoan gilayon ni Carlo Guieb sila si Berto, Jimmy ug Belen sa pagpasalipod sa mga panteyon sa sulod sa sementeryo. Wala na mangutikuti ang tulo kun unsay hinungdan nga gipatago man sila ni Carlo. Gituman nila ang gisugo sa detektib. Nag-iyahay sila’g pasalipod sa mga semento nga nitso. Si Carlo diha mopasalipod sa nitso nga bag-o lang gisudlan sa lungon sa iyang iyaan. Hugot niyang gigunitan ang Uzi.

“Nga-ngano man diay, Gaw?” Halos pugngan ni Belen ang tingog niini. Milabhag sa dagway sa dalaga ang kahadlok. Naluspad kini.

“May namatikdan kong laing sabaw,” matud ni Carlo. Ug gilingi niya si Jimmy nga nagpasalipod usab sa panteyon habig sa walang kilid. “Nadala ba nimo ang armas nga akong gihatag nimo, Gaw?”

“Oo, Gaw,” maoy tubag.

“Maayo hinuon,” nagkanayon ang detektib. “Gamita kana kun gikinahanglan.”

Walay tubag.

Naniid si Carlo. Mingaw na ang palibot. Wala na niya mabati ang langyaw’ng kinasikas nga iyang nasawod kaganina. Apan wala siya mokompiyansa. Sa natad sa panggubatan, maoy makabentaha ang segurista. Dili lang ang kaisog maoy gikinahanglan aron mabuntog ang kaaway kondili ang kaabtik sa hunahuna. Wala sa pinutong kondili anaa sa paggamit sa utok ang kadaogan sa bisan unsang sambunot.

Gihinay ni Carlo sa pagpagawas ang iyang ulo sa ngilit sa nitso nga iyang gipasalipdan. Gipagimaw niya ang kutob sa iyang mga mata ug misuling sa palibot. Ug mitingkag ang iyang mga dalunggan. Mao gayo’y misugat sa iyang panan-aw ang bayhon sa usa ka tawo nga maoy pagtapon gikan sa usa ka panteyon ngadto sa laing panteyon. Nagmaskara ang maong tawo ug armado. Nag-anam kini’g paduol sa ilang nahimutangan.

“Alisto, Gaw,” giingnan ni Carlo si Jimmy sa hagawhaw nga tingog. “Bantayi sila si Tiyo Berto ug Belen kay mokamang ko didto sa unahan. Kun may makita kang tawo, nasayod ka na sa angay mong buhaton.”

Wala motubag si Jimmy. Apan nagtuo si Carlo nga nakasabot kini sa iyang gisulti. -- Sumpayan pa