Hinog sa punoan

Gipusdak ni Urielle ang iyang kaugalingon ibabaw sa mahunolhunol nga kama sulod sa iyang lawak sa iyang paghiabot sa balay. Giumod niya ang iyang nawong sa unlan. Wala niya kapugngi ang paghilak.

Gisakitan si Urielle sa iyang nakita kaganina didto sa Ayala. Wala siya magdahom nga maoy iyang masakpan ang panagkita nila ni Patrick ug Chariz. Wala siya magtuo nga nakigkita pa diay si Patrick sa kanhi niining hinigugma bisan og kinasal na sila. Nagduda siya nga dili kay kadto rang higayona nga nagkita sila si Patrick ug Chariz. Makadaghan na tingali kini nila buhata ug kaganina lang niya nadiskubrehan ang sekreto nilang panagtagbo. Ug unfair kini sa iyang bahin tungod kay wala na man gayod siya makigkita kang Nelson sukad nga nakasal sila si Patrick.

Nagselos si Urielle. Nangabubho siya ngadto nila ni Patrick ug Chariz. Karon iya nang nasuta sa iyang kaugalingon nga gimahal na niya si Patrick. Mibati siya’g pangabubho tungod kay gihigugma na niya kini.

Apan wala tingali mahigugma si Patrick kaniya. Misantop sa iyang hunahuna nga hangtod karon hayan si Chariz pa gihapon ang gipitik sa kasingkasing ni Patrick. Ug nasipong niya ang tanang mga panghitabo sa ilang kaminyoon. Mao diay nga wala gayod angkona ni Patrick ang iyang pagka-babaye sulod sa kapin na sa tulo ka bulan nilang panagtipon tungod kay dili man diay siya ang babaye nga gihigugma niini. Tingali, maglisod gayod si Patrick sa paghikalimot kang Chariz. -- Sumpayan pa