Ang ungo nga paraygon

Dihang nakasal na sila si Jovit ug Layla, namatikdan ni Jovit nga mora’g agresibo kaayo sa ibabaw sa kama ang iyang asawa. Gani, sa unang gabii sa ilang kasal mora’g hapit dili na lang siya papahuwayon sa iyang batan-ong asawa.

Si Layla nagpanuigon nag bayinti siyete ug si Jovit mokapin na sa kuwarenta anyos. Pero, may ikabuga pa si Jovit kay dili man siya hago. Nindot ang matang sa iyang trabaho isip usa ka Personnel Manager sa usa ka dakong kompaniya sa siyudad. Iyang nakaila si Layla sa usa ka party nga nagsaulog sa birthday sa iyang higala nga si Julus.

Sa una pa lang niyang pagkakita kang Layla ingon sa mipitik pagbalik ang iyang kasingkasing. Biyudo man gud si Jovit. Bata pa siyang nabiyudo sa pangidaron nga trayenta ug wala pa gyud sila’y anak sa iyang kanhing asawa. Ug karon nga naminyo siya’g usa ka batan-on nga taga Lumboy, usa ka balangay nga nahimutang sa usa ka mamingaw’ng isla medyo nahulipan ang kahaw-ang niya sa iyang kalibotan.

“Jovvvvv, dili ka busy ronnn,” pinaluray ang tingog sa iyang asawa nga mora’g gusto na sab og kombati sa kama.

“Kay ngano man unta, Lay?” hinay nga nangutana si Jovi.

“Da, mamahuway sa gud ta, Sabado gud ron, unya ugma Domingo ug duna kay mga bisita, kay mag-inom mo,” niini pa nga misabak sa iyang bana. Nag-short lang si Layla ug miamag ang put niining paa nga mora’g kaputi sa ubod sa saging.

“Aw, ikaw gud, gusto man kaha nimo,” ni Jovit pa nga nakasabot na sa gusto sa iyang batan-ong misis. “Tana, manulod na ta sa atong kuwarto.”

Tuod, mahitabo na pud ang kombati ibabaw sa kama. Ug mora’g pagahilantawan ni Jovit nga lupigon gyud siya sa iyang asawa sa lahutay. Ug pugson na lang niya ang kaugalingon sa paghimo’g butang nga makalipay sa iyang asawa. Moinom siya’g vitamins pagana.

Unya, usa ka hapon dihang wala si Layla sa ilang balay ug siya rang usa. May nakita siyang usa ka gamay’ng sobre ug unya may sulod nga mora’g usa ka sulat. Iyang gibasa.

Ang sulat nagkanayon: “Inday Layla, pinangga namong anak, sultihi na ang imong bana nga ikaw kaliwat og ungo aron mahibawo usab siya. Karong umaabot nga pagtakdol sa buwan ikaw mahimo na unyang mangtas ug gusto namo nga patakdan na nimo ang imong bana pinaagi sa ilimnon nga gipadala nako nimo. Ipainom kini niya. Ug inig inom niini sa maong ilimnon nga gikan sa atong kaliwat, mangisog kana siya ug pangandami kini kay bangis na kana siya ibabaw sa kama. Ug sa giingon ko na, paimna kini siya takdo gyud sa pagsubang sa takdol...-- Tatay Cosme”

Mora’g gibati og kakulba si Jovit apan wala na ang kahadlok sa iyang dughan kay nahibawo na man siya bahin sa kaliwat sa iyang asawa gisultihan siyang Julus nga nakaila sa mga ginikanan nilang Layla.

Takdo pagsubang sa takdol sa buwan, miduol kaniya si Layla ug gipainom siya sa ilimnon nga mora’g alak ang kalami. Milad-ok siya. Ug pagka-taudtaod, giguyod dayon ni Jovit si Layla sa kuwarto ug didto ibabaw sa kama bangis kaayo nga nakigkombati si Jovit sa iyang asawa kinsa wala usab palupig sa gibuhat sa iyang bana.

Mora sila’g mga gutom sa lawasnong kahinam. Mingulob si Jovit. Miagulo si Layla. Ug dayon misulbong ang duha ka inagulo nga naghambin sa katagbaw sa diha sa ilang duha ka hubo nga mga lawas. Unya, pagkataudtaod, nahilom ang duruha. Nagtinutokay sila nga pulos na mga mangtas nga ungo. (Kataposan)