GULA 168
“Nakasabot ko sa imong gibati, Tiyo,” nagkanayon si Carlo nga gitupsan ang balatian sa tumang kaluoy. “Sa akong bahin, uyon ko sa imong desisyon. Apan kamo gayod ang may dakong katungod sa paghukom mahitungod niini. Mas maayo tingali nga kuhaon usab nato ang panahom sa imong mga anak.”
“Uyon ko sa desisyon ni Papa, Gaw,” gikan ni Belen.
“Ingon man usab ako, Gaw, dason ni Jimmy.
“Maayo hinuon kun mao kana,” nagkanayon si Carlo. “Kanus-a man ang gusto ninyo nga ipalubong nato si Tiya?”
“Kun mahimo,” si Tiyo Berto ang mitubag,” sa Domingo, Dong.”
Nahatan-aw si Carlo nila ni Jimmy ug Belen.
“Uyon ko sa gisulti ni Papa, Gaw,” matud ni Jimmy nga daw nakasabot sa tinan-awan sa detektib nga daw mipahunat kanila.
“Ang problema,” ni Belen pa, “si Ate Arlin. Kinahanglang masayod siya sa atong gikasabotan aron makahukom siya kun motambong ba o dili sa paglubong ni Mama.”
“Ako nay maantigong mopasabot kaniya,” matud ni Carlo. “Giingnan ko na siya nga dili maayong mopauli siya dinhi kay basin makita na hinuon siya sa mga sakop sa kulto. Delikado kun masundan siya ug matultolan nila ang nahimutangan karon ni Inday Shantal.”
“Husto si Agaw Carlo, Day Belen,” ni Jimmy pa. “Makasabot tingali ang kalag ni Mama kun dili makatambong si Arlin sa paglubong kaniya tungod sa kalisod sa sitwasyon.”
“Mao kana,” ni Carlo pa. “Mas maayo gyud usab nga ikalubong na nato si Tiya aron kasugdan na nato pag-akuta ang lain pang mga problema.”
“Mao usab kana ang usa sa akong mga tumong, Dong,” dason ni Tiyo Berto.
“So...nagkasinabot na kitang tanan,” subli nga gipahunat ni Carlo ang tulo.
“Sa Domingo ipalubong na nato si Tiya Marta.”
Hapit nagkadungan ang tulo sa pagtando. -- Sumpayan pa