Uhaw sa karinyo - Gula 1

Nakahuna-huna si Ricardo nga bulatikan niya’g gamay si Leny. “Bilib kaayo ko nimo Len kay bisan og duha ka buwan na namatay ang imong bana, apan kanunay ka gihapon nga mobisita sa iyang lubong.”

Milingi og gamay kaniya si Leny sa wala pa motubag. “Dili uy, usa ka semana pa siya nga gipatay sa iyang kainom. Nasayop ra kadtong nasuwat didto sa lapida apan wala na lang nako ipausab kay wala nay kapuslanan.”

“Buotan kaayo kadto si Efren nga akong bana. Dugay na kaayo mi nga steady ug tulo ka buwan pa lang gikan sa among kasal dihang siya gipatay,” daw may kasubo ang tuno sa tingog ni Leny.

Gipikpik ni Ricardo ang abaga ni Leny pinaagi sa iyang wala nga kamot. “Uy dia na diay kita tungod sa UP. Salamat kaayo sa imong pagpasakay nako Len ha? Yuna, dia ang akong calling card basin og may ikaalagad ko kanimo.”

Igo lang mipahiyom si Leny ug dayon mipadagan human makakanaug si Ricardo ug masirad-i ang pultahan sa sakyanan nga Crosswind sa byuda. Wala dayon duawa og duka si Ricardo nianang gabhiona. Naglisud siya sa paglaksi gikan sa iyang kaisipan sa maanyag nga dagway ni Leny ug sa iyang kalooy sa nahitabo sa iyang bana.

Nagmahay siya sa hilom ngano nga wala siya makahuna-huna pagpangayo’g cellphone number ni Leny sa dayon niyang kanaug sa sakyanan kaganina. Bisan og nakaagi na og lalaki si Leny apan daw dalaga gihapon siya tan-awon.

Pagka Domingo, mibisita na usab si Ricardo sa lubong sa iyang Mama sa Queen City Gardens. Namasin siya nga ikakita niya pag-usab si Leny apan wala siya’y swerte kay wala moadto si Leny.

Gitan-aw ni Ricardo ang nahimutangan sa lubong sa bana ni Leny apan wala didto ang byuda.

May kalit lang misantop sa iyang huna-huna. Milakaw siya paduol sa lubong. Gitutokan niya ang lapida sa bana ni Leny. Dayon hinay niya nga gikuot ang iyang pitaka ug gihulbot ang usa ka calling card.

Gikuha ni Ricardo ang iyang ballpen ug gisuwatan ang luyong bahin sa calling card. “I Miss You so much, Leny. Hope to see you once again.”

Gibutang ni Ricardo ang calling card nga gisandig niya sa lapida tupad sa laya na nga buwak nga sigurado siya nga dala ni Leny sa iyang pagbisita kaniadtong miaging semana.

Luya si Ricardo nga mipauli. Nanglabay ang mga adlaw. Usa ka gabii, nakamata si Ricardo gikan sa iyang pagkatulog kay mitingog ang message alert sa cellphone. Wala marehestro sa iyang cellphone ang numero. “Hello, muzta Rick? Sori dugay ko naka-text nimo kay nawani ang gihatag nimo nga calling card.”

Kalit lang mikagiw ang duka ni Ricardo. Iya dayong gibawsan ang text ni Leny. “Salamat kaayo nga mi-text ka nako Len kay natambalan ang gihambin ko nga kamingaw nimo.” (Sumpayan)