Hinog sa punoan

Gula 81

Namatikdan ni Urielle nga misamot ang kagaan sa iyang kabubut-on karon ngadto kang Patrick. Apan wala pa siya makapiho sa real score tali kanilang duha karon bisan tuod nga magtiayon na sila. Kay si Patrick ingon sa pulos lang pasumbingay ang gihimo. Si Urielle sab dili makatino sa iyang gibati ngadto kang Patrick hangtod nga dili maklaro kun unsay tinud-anay nga gibati sa lalaki kaniya. Mora bag nag-agad lang usab siya kun unsay bation ni Patrick.

Nakaseguro na hinuon ni Urielle nga hingpit na siyang nakadawat kang Patrick isip iyang bana. Wala siya’y ikasaway sa pagkatawo ni Patrick. Buotan kini, mapinanggaon ug responsable nga pagkabana. Ambongan pa gyud. Sapian. Unsa pa bay iyang pangitaon nga hiyas sa usa ka lalaki nga wala kang Patrick?

Diha siya sa lawom nga paghinuktok pagtingog sa message alert tone sa iyang cellphone. Iya dayong gisusi kun kinsay nag-text. Si Patrick! Gibasa dayon niya ang text niini.

Ang text ni Patrick nagkanayon: “I’m longing 4 d day I hear u say that you’ll b mine. I need 2 have u near me all d tym. But 8s not exactly clear what I should do 2 win ur heart and how I will make u see that u mean everything 2 me.”

Nakapahiyom si Urielle human mabasa ang text ni Patrick. Unya nakapanglingo siya. Nagsugod na usab si Patrick sa pagpadala og sweet text messages kaniya. -- Sumpayan pa