Gula 76
“Dili na nato iapil si Nelson sa esena. May kaugalingon na kitang kinabuhi ug pamilya nga angay natong atimanon.”
Nahitutok si Patrick kaniya. Nagkatagbo ang ilang mga mata. Dugay gayod ang pagbag-iray sa ilang mga panan-aw.
Human sa taudtaod nga pagtinutokay, mipahiyom si Patrick kang Urielle.
“Belib ko nimo,” ni Patrick pa.
“Ngano man?” sukit ni Urielle.
“Bisan di ka moangkon, pero nasayod kong napugos ka lang sa pagpakasal nako tungod kay mao kini kagustohan sa atong mga ginikanan.”
“Mas dili katuohan ang imong pag-uyon sa kagustohan ni Daddy nga akoy imong pangasaw-on.”
“Ngano man?”
“Kabos ko’g kagikan. Dili ko ikapasigarbo sa inyong pamilya.”
Nahikatawa si Patrick.
“Dili ko mata-pobre,” sa lalaki pa. “Gawas pa, natagbaw ko sa pagpasabot ni Daddy kun nganong ikaw ang angay kong pangasaw-on. I think Daddy knows best kun kinsay angay para nako.”
“Pero napakyas ang gugma ninyo ni Chariz.”
“Sagdi lang. Tingali, right love at the wrong time kadtong amo. Ug kun dunay gugmang mawala, duna say moabot puli niini. Ang gugma makat-onan ra kuno sa kadugayan. Moabot ra kini sa tukmang panahon nga gitakda.” -- Sumpayan pa