Anino sa kulto

Gula 158

“Pagpadala og pipila sa imong mga sakop diri aron maoy mougkat sa mga kaaway nga akong napatay, Dick,” ni Carlo pa.

“Oo, Carlo,” tubag sa hepe. “Karon dayon...akoy mangulo sa akong mga sakop nga moanha diha.”

Igo lang nahuman ang panagsulti nila ni Carlo ug Maj. Campo, nakamatikod ang detektib nga may migimok sa iyang luyo. Dihadiha milingi siya. Ug nahasiga ang iyang mga mata. Maoy misugat sa iyang panan-aw ang kaaway -- kadtong ulahi niyang napusilan -- nga mihinay pagkab-ot sa armas niini nga nahasalibay sa duol. Gidali paglanit ni Carlo ang Uzi.

“Buhi ka pa diay!” ni Carlo sa tumang kamapungtanon dungan sa pagkablit sa gigunitang armas aron pagtiwas sa kaaway.

Milit-ad ang kaaway nga naigo sa ulo. Naseguro ni Carlo nga patay na gayod kini.

Wala dangti’g napulo ka gutlo nahiabot ang kapolisan sa balay ni Carlo. Unom silang tanan lakip si Maj. Campo. Gimandoan gilayon sa hepe ang iyang mga sakop sa pagsiksik sa tibuok dapit sa balay. Milihok dayon ang mga polis.

“Unsa na man sab ning hitaboa, Carlo?” pakisayod ni Maj. Campo nga miduol kaniya nga nagtindog duol sa pultahan.

“Mga sakop gihapon sa kulto, Dick,” laktod nga tubag ni Carlo. “Apan pulos sila mga danghag. Gihatagan ko nila’g clue aron makabantay ko nga ila akong gihup-an. Naa, sila hinuoy natodas.”

Wala na motingog si Maj. Campo. Miduol kini sa nahagbaan sa usa ka napatay ni Carlo. Mitikubo. Ug gitutokan ang patay’ng lawas. Gipasagdan lang ni Carlo ang hepe. Nabasa ni Carlo ang kayugot nga mihun-ag sa panagway niini. Taudtaod mibarog kini ug miduol kaniya.

“Maayo gani kay nakabantay ka,” sa hepe pa. “Kun wala ka pa makapangandam, ikaw untay ilang maunhan.”

“Dili pa gyud akong oras, Dick,” mubong tubag ni Carlo nga may lahing kinidlap nga nakita sa mga mata sa hepe.

Miduol sa ilang nahimutangan ang usa sa mga sakop sa hepe. -- Sumpayan pa