Usa ka kabakaba nga laag misakdapsakdap sa kaisipan ni Carlo.
“Mahimo bang makigsulti ko bisan kinsa kanila ni Tiyo Berto ug Jimmy, Dick?” mihangyo si Carlo.
“Sure,” tubag sa hepe. “Kadiyot lang.”
Naghulat si Carlo. Wala madugay, nabati niya ang tingog ni Tiyo Berto. Gidiritso ni Carlo ang iyang tuyo.
“Motabang ko sa kapolisan sa pagpangita ni Tiya Marta,” matud ni Carlo. “Pauli dayon mo diri sa balay kay walay kauban si Belen. Dili ko mobiya diri kun dili kamo mahiabot.”
Mitando si Tiyo Berto. Unya mao na usay iyang nabati ang tingog ni Maj. Campo.
“Moanha ko diha, Dick,” ni Carlo pa.
“Paaboton ko ikaw, Carlo,” sanong sa hepe.
Human sa ilang panagsulti ni Maj. Campo, gimandoan gilayon ni Carlo si Belen sa pagsera sa tanang bentana ug pultahan sa balay. Gibaoran niya ang ig-agaw nga dili gayod mokompiyansa ilabi na nga nagkainit na ang sitwasyon. Mikiros si Belen pagtuman sa iyang gisugo.
Samtang nagpaabot nila ni Tiyo Berto ug Jimmy, si Carlo midalikyat pagkuha sa iyang knapsak didto sa guest room. Sa iyang paghibalik sa sala, nahuman na si Belen sa pagpanerado sa mga bentana ug pultahan sa balay. Diha na nila ablihi ang pultahan sa pag-abot nila ni Tiyo Berto ug Jimmy.
“Ayaw gayod kamo paggawas dinhi sa balay ilabi na unyang gabii,” pahimangno ni Carlo. “Panerado kamo kanunay. Kun may makita kamong mga tawo nga katingad-an ang mga lihok, tawag gilayon kamo sa buhatan sa kapolisan o sa akong cellphone.”
Mitando ang tulo agi’g sanong sa iyang pahimangno.
Sa wala pa molakaw si Carlo, iyang gibilin kang Jimmy ang iyang .45 kalibreng pistola. Dili unta modawat si Jimmy apan iya kining gipasabot. -- Sumpayan pa