GULA 153
“Mga hungog kamo!” Mitungas ang tingog ni Carlo. “Wala’y sala kaninyo ang mga bata nga inyong gipangbiktima!” Apan wala nay mitubag kang Carlo. Mao pa siya makaamgo nga naputol na ang linya. Misamot ang gibati niyang kalagot nga wala matiwas ang panagsulti nila sa supremo.”
Giuli na lang ni Carlo ang iyang cellphone ngadto sa bulsa sa iyang diyaket. Mao pa siya makamatikod nga duol na diay siya sa gipuy-an nila ni Tiya Marta.
Paghunong ni Carlo tungod sa gate nga puthaw sa koral sa balay sa iyang iyaan, dihadiha nalantawan niya si Belen nga migawas. Wala na ang mga polis nga nagbantay sa palibot. Si Belen naghilak nga misugat kaniya.
Dili tiaw ang gibating kabalaka ni Carlo Guieb human siya kasultihi ni Belen nga si Tiya Marta gidagit sa wala hiilhing mga tawo. Sumala sa giasoy ni Belen, kaganina sa buntag milakaw ang iyang iyaan aron pagpakigkita ni Padre Daniel. Gikuyogan kini og duha ka polis. Apan gisundan diay sila sa mga tawong daotan. Wala magsilbi ang mga eskort sa iyang iyaan. Ang duha ka polis pulos nakabsan sa kinabuhi ug si Tiya Marta gidala sa wala hiilhing mga kidnaper.
Si Carlo nakahimo gilayon og konklusyon mahitungod sa pagkadagit sa iyang iyaan. Wala siya’y laing gidudahan gawas sa mga sakop sa Tambayawan Black Brotherhood. Ang maong pundok lang maoy may bug-at nga hinungdan sa paghimo sa ingon sa iyang iyaan. Mga salbahis gyud ang mga Tambayawan!
“Among gipugngan si Mama sa dili paglakaw,” ni Belen pa nga naghilak. “Apan namugos gayod siya kay gusto kuno siyang makigkita ni Padre Daniel. Mao kadto nga gipakuyogan na lang siya ni Papa sa duha ka polis nga guwardiya dinhi sa balay. Apan nadala gyud si Mama sa mga kidnapper.”
“Sila si Tiyo Berto ug Jimmy?” ni Carlo pa nga nakaalingat nga wala ang duha sa balay. “Hain man sila?” “Nagkuyog sila ngadto sa kuwerpo sa kapolisan,” maoy tubag. “Kaganina ra to sila.”
“Kun mao nag-inusara ka lang diay dinhi?” ni Carlo nga ingon sa mibati na hinuon og kabalaka nga naghunahuna nga walay kauban ang iyang ig-agaw. Kun simbako tinuntohan kini sa mga sakop sa kulto, walay makatabang sa dalaga. -- Sumpayan pa