Hinog sa punoan - Gula 69

Si Urielle ra gayod ang kanunay mag-inusara sa pagkatulog sa master’s bedroom. Si Patrick nagpabilin nga adto maghigdaan sa guest room.

“Dinhi sila si Daddy ug Mommy kaganina,” gibalitaan ni Urielle si Patrick usa ka hapon niana sa paghiuli niini gikan sa trabaho.

“Mao ba?” ni Patrick. “Nganong wa man ko nimo pahibaw-a? Mi-text unta ka nako aron makadalikyat ko’g pauli.”

“Mao bitaw unta kanay akong buhaton,” ni Urielle pa. “Apan mipugong si Mommy. Dili kuno siya gustong mabalda ka pa sa imong trabaho.”

“Unsa man lang diay ilang tuyo?” Usisa sa lalaki.

“Nagsusi sa atong kahimtang,” maoy tubag. “Nagpakisayod kun mabdos na ba ko.”

“Unsa? Kaapurado ba sab nila, uy.”

“Gusto na lagi kuno silang makakita sa ilang apo.”

“Unya, unsa may imong gitubag?”

“Aw, akong giingnan nga wa pa gyud bisa’g tiki. Nahikatawa man gani si Daddy.”

“Ngano man?”

“Hinay ka kuno kaayo. Diriyot nako masultihi nga unsaon man nako pagmabdos nga wa may...”

“Sa sunod gani kun mangutana sila, ingna nga di pa karon ang hustong panahon aron momabdos ka. Okey?”

“O-okey...” -- Sumpayan pa