Hinog sa punoan

Gula 68

Ginindotan si Urielle sa mga mensahe nga gipadala ni Patrick kaniya pinaagi sa text. Maka-in love ang maong mga mensahe. Gi-save kini ni Urielle sa iyang cellphone. Ug makapila kini niya subli-sublia pagbasa hangtod nga nahapon.

Mitangkod nga tulo ka bulan ang panagtipon nila ni Urielle ug Patrick sa salag sa kaminyoon. Nasuta ni Urielle nga tinuod ang gisulti sa iyang inahan ug ugangang lalaki kaniadto nga dili siya magmahay sa iyang desisyon sa pagpakasal kang Patrick. Iyang namatud-an karon nga wala gayod siya’y angay mahayan tungod kay buotan ug mapinanggaon man si Patrick kaniya.

Sa gidugayon sa ilang panagtipon, sila rang duha ang nasayod sa matuod nga nahitabo sa ilang kaminyoon. Hangtod niining higayona, nagpabiling birhen si Urielle. Wala gayod mangahas si Patrick sa pagtukbil sa iyang pagka-babaye bisan may dako kining katungod kaniya sanglit iya man kining bana.

Usahay gani makapangutana si Urielle sa iyang kaugalingon kun nganong gipakaslan man siya ni Patrick nga wala man diay kini interes sa iyang pagka-babaye. Nakasabot siya nga kabahin ang sex sa kinabuhi sa magtiayon. Pero si Patrick ingon sa wala lang magpakabana sa iyang pagka-babaye.

May mga higayon nga adunay daghang mga pangagpas ug mga katahap nga mosantop sa iyang hunahuna mahitungod kang Patrick. Gusto siyang makigsulti ni Patrick mahitungod niining maong butang aron masayran niya ang matuod. Apan mauwaw siya kun maoy mouna sa pag-abli sa maong hilisgotan tungod kay usa man lagi siya ka babaye. Mao nga nagpabilin ang bugtong “gap” sa ilang pagka-magtiayon -- ang sex. -- Sumpayan pa