Anino sa kulto

Gula 150

“Importante kaayo ang among tuyo, kuya,” nagkanayon si Arlin nga ang panuni giabyan sa kaligdong.

“Unsa man diay kana?” Tul-id nga pakisayod ni Roding.

Wala motubag si Arlin. Mitan-aw hinuon kini ngadto ni Carlo. Nakasabot usab gilayon ang detektib. Mitan-aw siya kang Maj. Campo. Mikidhat ang hepe kaniya.

Miigham si Carlo aron paghawan sa iyang tutunlan. Uran-uran, misugod na siya sa pagpadayag sa ilang katuyoan. Iyang gipasabot ngadto kang Roding ang lintunganay’ng hinungdan kun nganong nahiabot sila dinhi sa Carmen. Matag karon ug unya mosagbat sila si Maj. Campo ug Arlin aron paghatag og dugang katin-awan. Si Roding maduluton nga namati sa ilang mga detalye.

“Mao kini ang nahimong resulta sa inyong mga kabuang, Arlin,” nagkanayon si Roding nga ingon sa nagasudya. Nasayod na diay kini sa pagsagop nila ni Arlin sa tinuohang satanismo. “Giingnan ko na bitaw kamo nga kamo ra usab ang magsakripisyo sa inyong pagdawat nianang walay hinungdan nga tinuohan.”

“Nagbasol bitaw kami, Kuya,” ni Arlin pa nga nagduko,” kun nganong nagpadani kami sa kulto.”

Naputol ang ilang panagsulti dihang nahiabot ang katabang ni Roding nga nagsapwang sa tray nga gipatungan sa ilang esnakunon. Mga tinapay ug upat ka basong mango juice nga bugnaw. Gipahimutang kini sa sulugoon ibabaw sa gamay nga talad sa ilang atubangan. Dayon mibiya kini kanila.

Nangaon sila ug nanginom sa pabugnaw.

Uran-uran, gitibawas na ni Carlo ang pagpadayag sa ilang tuyo.

Wala magdumili si Roding sa hangyo nila ni Carlo nga anhi lang una sa iyang panimalay sila si Arlin ug Shantal samtang wala pa masulbad ang mga krimen nga nahitabo didto sa lungsod sa Mabini diin nahilambigit ang Tambayawan Black Brotherhood. Kadali ra nilang naplansa ang kasabotan. -- Sumpayan pa