Ang Valentino ni Sol

Pebrero 14. Alas dos sa hapon. Gipakuyog na gyud ni Soledad si Wilben, iyang kaklase nga nangulitawo niya. Nagtupad silag lakaw sa dalan Colon. Motambong una si Soledad sa iyang klase sa University of San Sebastian. Inig pamuhi niya sa alas singko, manan-aw silag sine unya manihapon sa restawran nga ilang mapilian sa down town.

Duha ka tuig na si Wilben nga nangulitawo sa dalaga. Wa lang una sugta ni Soledad kay wa pa niya mabuwagi’g pormal iyang unang boyfriend. Unsaon wa may klaro ilang relasyon ni Jerome. Nagkauyab silag Valentine's Day. Unya human adto, duha pa ka Valentine's Day ang nilabay nga igo lang mo-greet si Jerome niya nga Happy Valentine's Day. Unya wa na dayon.

Ug nakita na ni Soledad si Jerome nga naglakaw sa unahan. Unya hapit na nila ikasugat. Gikulbaan si Soledad. Kay nakahukom na siya nga buhaton na niya ang iyang gilaraw.

Seaman si Jerome. Purser siya sa m/v Esmeralda nga magbiyahean sa Manila-Cebu vise versa. Kada Miyerkules sa gabii modunggo sa Cebu ang barko. Makahigda sa ilang balay si Jerome sa barrio Huamoco ning dakbayan ma-Miyerkules ug Huwebes. Biyernes sa buntag balik na sab sa Manila.

"Sorry, kaayo Sol nga tagsa ra ta magkita. Busy kaayo ko sa opisina sa kompanya kada dunggo nako sa Cebu," rason ni Jerome sa higayong mo-teks siya sa uyab. Naglibog hinoon si Sol (iyang angga) kun seryoso ba si Jerome sa ilang relasyon.

Nagpuyo si Sol sa barrio Kamsa sikbit nga baryo sa gipuy-an ni Jerome. Sa estudyante pa si Jerome og Nautical, wa pa kasakay og barko, hapit kada buntag mag-abot sila sa puso nga kawsanan ug kaligoanan ni Sol. Anha sab siya tigpanglaba. Kay anha man tigkaligoan si Jerome ug tigkawos og tubig. Kasagarang iabot nila, maatol nga dunay drama sa radio nga ilang mapaminaw sa balay duol sa puso. Ang ulohan sa drama "Sultihan Ko Ikaw Sa Akong Gugma". Sublisublion nig litok ni Jerome sa pag-ingon "Sul--tihan ko ikaw sa akong gugma". Makalingi lang pirmi si Sol, kay dugay man niyang litokon ang tibook pulong "sultihan". Moingon man una siya "Sul...." dayon palabyon ang pila ka gutling usa sumpayan og "...tihan ko ikaw..."

Nakaingon sa kaugalingon si Sol nga gusto tingaleng mangulitawo niya,apan di lang kadirektag sulti. Ipaagi lang sa ulohan sa sugilanon sa radio. Apan nahulog gyud iyang pagbati sa ulitawo dihang nasundan siya niini padulong sa eskina nga sakyanan niyag dyip para eskuylahan. Valentine's Day kadtong adlawa. Nihinay og lakaw si Sol kay nabungkag ang zipper sa iyang sayal. Gipugos niyag sul-ob bisag natuboan na niya.,

"Nganong nagpugong ka mas imong kilid?" ni Jerome.

"Nabungkas lagi akong sayal" ni Sol. Maulawon.

"Ay'g kabalaka. Dia koy ganso nga dako. Gansohi lang una na" ni Jerome. Nitakilid siya. Niatubang sa koral nga semento daplin sa karsada. May gitangtang sa iyang pundiyohan. Ginansohan diay iyang long pants kay luag niya.

"Salipdan tika aron way laing makakita" ni Jerome nga nagtunol sa dakong ganso.

"Sol, Valentine's Day man ron. Ikaw akong Valentina ha?. Ako imong Valentino?. Okay ka?" ni Jerome samtang nagganso si Sol sa iyang sayal.

Wa kabalibad si Sol kay nag-ilag dakong utang kabubut-on sa tabang sa ulitawo.

"Unya uyab na ta" ni Jerome.

"Sige god. Uyab man kaha" ni Sol nga niparag dyip depasaheroan. Nagluksolukso si Jerome sa kalipay.

"Huwaton tika dinhing eskinaha karong hapon ha?" ni Jerome. Nitando si Sol. Nalipay sab siya.

Hilom siyang may gusto sa ulitawo, kay kugihan, buotan ug matinabangon sa iyang mga ginikanan. Nanan-aw lang silag sine adtong gabhiona. Unya nanuroy sa Plasa Independencia.

Human adto, wa na sila magkita.Kay nakasakay na diay og barko si Jerome. Kaduha sila nag-abot sa Colon. Primerong tuig sa ilang panag-uyab ug sa ikaduhang tuig. Niingon lang si Jerome niya "Happy Valentine's Day" Unya nisaylo lang dayon.

"Happy Valentine's Sol!' ni Jerome dihang nagsugat na sila.

"Same to you, Jerome" ni Sol.

"Kinsa man nang imong kuyog?!' ni Jerome. Daw nangabubho.

"Si Wilben akong uyab. Ilaila mo" ni Sol.

"Ha? Di ba kita may uyab?" ni Jerome.

"Dili tingale oy! Naa bay uyab nga magkita lang kada Valentine's Day?" ni Sol. Napatiurok si Jerome.

"Okay. Okay. Sige. Adto na lang ko!' ni Jerome nga daw wa sa kaugalingon. Naglingolingo nga nipadayon paglakaw. Unya nagpanglingi ni Sol nga nagtibi.

"Tana Wilben" ni Sol nga nigunit sa bukton sa ulitawo. "Pasagdi na siya oy! Wa man toy buot tawhana!" dugang ni Sol. (Katapusan)