Anino sa kulto

GULA 145

Milingkod sila si Carlo ug Maj. Campo sa duha ka bakanteng lingkoranan. Miabot si Belen nga nagsapwang og tray nga gipatungan sa unom ka tasa nga gipangsudlan sa mainit nga kape. Diha usay mga tinapay nga gisulod sa plato. Gibutang ni Belen ang mga pagkaon diha sa gamay’ng talad sa taliwala sa alirong. Si Belen mibalik dayon sa kosina.

Namainit sila.

“Hain man diay ang bata, Gaw?” si Arlin ang girumbo sa pangutana ni Carlo dayong higop sa mainit nga kape sa tasa nga iyang gikuptan.

“Nakatulog na, Gaw,” maoy tubag.

“Unsay plano ninyo karon?” Nanaghap pagsukot si Carlo. Nagtuo siya nga may gikasabotan ang upat hinungdan nga gipatawag sila si Maj. Campo niini.

“Nakahukom kami nga ilikay ang bata, Dong,” si Tiya Marta ang mitubag sa pangutana sa detektib.

“Ipalayo namo siya niining dapita, Dong,” dugtong ni Tiyo Berto,” aron mahalikay siya sa mga sakop sa kulto. Bahala na’g makapalta sa pag-eskuyla ang bata. Pasabton lang namo ang iyang magtutudlo. Ang mahinungdanon niining higayona mao ang iyang kaluwasan.”

“Husto ka, Tiyo,” ni Carlo pa. “Pero asa man nato itago ang bata?”

Nakahunahuna mi, Dong,” ni Tiya Marta pa, “nga adto una ang bata sa anak sa igsoon ni Berto nga atua magpuyo sa Ubay.”

Niining higayona, misagbat si Maj. Campo sa panagsulti. Gipahungaw sa hepe ang diha sa hunahuna niini. “Nagtuo ko nga dili safe ang bata sa maong dapit,” nagkanayon kini.

“Nganong nakasulti ka’g ingon niana, Dick?” gitutokan ni Carlo ang hepe.

“Duol ra kaayo ang Ubay gikan dinhi,” mipasabot si Maj. Campo. “Dali rang matiktikan sa mga disipulo sa kulto ang bata didto.”

“Hain may maayo,” misalmot si Jimmy. “Kun adto na lang nato tagoi ang bata sa kong igsoon?”

“Hain man kanang igsoon mo magpuyo?” sukit sa hepe.

“Sa Carmen,” tubag ni Jimmy. “Maayo didto kay layo-layo na.” -- Sumpayan pa