Estoryahe!

Gula 5

Nahimong malipayon ang panag-uban nila ni Geraldine ug Mike didto sa beach resort sa San Remigio.

Dihang mikilum-kilum na, gisukna ni Geraldine si Mike kun ganahan ba kini nga maligo. Nangatarungan si Mike nga wala siya’y dala nga extra short pants ug T-shirt.

“Nagpa-rent sila og short pants Mike ang resort unya mahimo ka nga mogamit sa mga extra nako nga T-shirts duna ko’y mga dagku nga size diha sa akong bag,” matud ni Geraldine.

Gamay ra ang mga guests sa resort niadtong adlawa sanglit adlaw man nga Martes. Matud sa kawani sa resort nga Sabado g’yud ang daghan og mangaligo.

Daw mga bata sila si Geraldine ug Mike. Nagdakpanay sila tungod kay nalingaw sila sa pino kaayo nga mga bas sa baybayon ug tin-aw usab kaayo ang tubig kay walay bawod.

Gituyo usab sa tagdumala sa beach resort nga ang suga nga gibutang didto ra sa layo aron nga igo ra kini nga mohatag og dan-ag sa mangaligo.

“Dakpa ko Mike!” matud ni Geraldine sa dayong sawom niini ug kalit lang nawala sa tubig sa dagat. Maayo nga molangoy si Geraldine mao nga gisukod niya ang abilidad ni Mike sa pagsawom.

Gibantayan ni Mike ang pagtunga ni Geraldine gikan sa ilawom sa tubig. Dihang mitunga na kini didto sa unahan, diha pa nga hinay’ng mitidlom si Mike paingon sa nahimutangan niini.

Daw nahalingi-lingi si Geraldine kay linaw kaayo ang tubig ug wala niya makita si Mike. Apan pagkataud-taud, diha na si Mike sa iyang atubangan ug migakus dayon kini kaniya.

“Nadakpan ko na g’yud ikaw! Ha! Ha! Ha!,” matud ni Mike nga nahinangop kaayo nga nasakpan niya ang idlas kaayo nga si Geraldine. Daw inanay nga nalum-oy si Geraldine nga nagakus ni Mike.

“Pagkaswerte nako nga nagakus ka naku niining higayuna Geraldine,” matud ni Mike nga inanay nga gipiit pa sa paggakus sa gwapa nga abogada.

Wala maglangan si Mike. Giukoban dayon niya’g hawok ang mga ngabil sa dalaga. Bisan og anaa sila sa dagat, apan nabatyag gihapon ni Mike ang tam-is nga laway ni Geraldine.

“I love you Geraldine,” hinay nga gilitok ni Mike ang tulo ka sagradong mga pulong dayong ukob niya pagbalik sa mga ngabil sa dalaga.

Ang kabugnaw sa tubig niadtong gabhiona wala makapabatyag og katugnaw sa nag-uros-uros nga kalawasan sa duha nga padayong naggaksanay.

Sa unahan, nakita usab nila ang duha ka laing paresan sa babaye ug lalaki nga pareho kanila nagtupad sa pagpangaligo. (Sumpayan)