Hinog sa punoan

Gula 60

“Pero di ko gustong mahago ka’g maayo.”

“Okey ra lagi ni. Mas bation ko’g kalaay kun wa koy buhaton. Mao nga di na kinahanglan nga mokuha pa kita’g katabang.”

“Buyno, ikaw ang mag-igo.”

Namatikdan ni Urielle nga inanay nang nawagtang ang kabakikaw sa higayon nga magkasulti sila si Patrick. Komportable na siyang makigsulti sa lalaki.

Pagkahapon, sayong nahiuli si Patrick sa balay. Si Urielle nga niadtong tungora diha sa lagwerta sa balay kay namisbis og tubig sa mga tanom, midali pagdagan paingon sa gate pagkadungog sa busina sa sakyanan ni Patrick. Iyang giablihan ang gate aron makasulod ang gisakyan sa iyang bana.

Dihang napahimutang na ang sakyanan sa garahe, nagkuyog sila si Urielle ug Patrick paingon sa sulod sa balay. Wala na niya tiwasa ang pagpamisbis sa mga tanom kay giingnan siya ni Patrick nga may mahinungdanon kining pakigsultihan kaniya.

“Ikaw nay gunit niini,” nagkanayon si Patrick dungan ang pagtunol sa duha ka card ngadto ni Urielle dihang didto na sila sa sala.

“U-unsa man kini?” Mikunot ang agtang ni Urielle nga misukna samtang mipasiklap ngadto ni Patrick ug dayon mitan-aw ngadto sa duha ka card nga diha na sa iyang mga kamot. -- Sumpayan pa