Hinog sa punoan

Gipangga usab si Urielle ni Patrick. Matag abot niini gikan sa trabaho, may dala gayod kining pagkaon alang kaniya. Bisan unsa lang, sama sa chocolate, ice cream ug uban pang kinaham nga kalan-on sa usa ka babaye.

Usa lang ka butang ang wala pa gayod mahitabo tali kanila ni Urielle ug Patrick -- ang sex. Hangtod niining higayona, si Patrick wala pa gayod mangahas pagkutlo sa gihay sa kaputli sa iyang pagka-babaye. Naglain og higda si Patrick. Si Urielle maoy naghigda sa master’s bedroom. Si Patrick adto magkatulganan sa guest room.

Sa hilom mibati na’g kaluoy si Urielle kang Patrick. Dili ba kaha nga giantos lang ni Patrick nga dili motandog sa iyang pagka-babaye tungod kay nabalaka kini nga iyang balibaran tungod kay nasayod kini nga wala siya mahigugma niini? Nasuta ni Urielle nga dako gayod kaayo ang pagrespeto ni Patrick sa iyang pagka-babaye bisan sa kamatuoran nga dako ang gintang sa ilang kahimtang sanglit adunahan man ang mga ginikanan sa lalaki samtang siya kabos og kagikan.

“Kun gusto ka, mokuha ta og katabang,” sugyot ni Patrick usa ka buntag niana sa ilang pagpamahaw. “Aron ba may katabang nimo sa mga buluhaton dinhi sa ba’y ug di ka sab abton og kalaay nga mao rang usa.”

“A-ayaw na lang,” balibad ni Urielle. “Anad ko sa trabaho. Masugakod nako ang tanang mga bulohaton sa ba’y.” -- Sumpayan pa