Mga tango ni Uray Masing

Dugay nang nahimong mananabang si Uray Masing. Bisan sa dalaga pa siya duna nay mokuha niya aron siya’y mopaanak. Sukad masukad wala pa gyud hinuoy ingnon tang punga nadisgrasya sa pagpanabang ni Uray Masing.

Dinhi sa ilang baryo sa Magtakus si Uray Masing ang giisip nga maoy karaang mananabang. Apan dihang gibutangan nag mga batan-ong midwife ang Barangay Hall aron kun dunay manganak o magbati panahon sa tungang gabii naa dayoy masangpit ang mga lumolupyo.

Ug ning panahona karon mora’g wala na kaayoy mokuha kang Uray Masing. Sukad nga nagpangidaron na siya’g setenta isingko anyos laksot na kaayo ang iyang hitsura.

Taudtaod na hinuon nga nabiyuda si Uray Masing ug ang ilang anak nga si Monica tua na manimuyo sa Mindanao kay gidala sa iyang bana. Kun magtan-aw ka sa nawong ni Uray Masing makaingon ka sa imong kaugalingon nga ungo kini si Uray kay laksot kaayo siya nga tan-awon labi na’g wala nay mga ngipon ang iyang mga lagos.

Ug kay daan nang suwangon si Uray misamot kini ka suwangon nga wala na siya’y mga ngipon. Daghang nagtuo nga gidawat ni Uray Masing ang kabilin sa ilang kaliwat. Ang inahan ni Uray Masing nga si Nang Luncia puwerting ungoa kay mamugno bisa’g sayo pang hapon. Ug karon wala nay magpatabang kang Uray Masing kun dunay magbati.

“Si Uray Masing na lang ang atong kuhaon, uy, Undoy,” ni Milay pa ngadto sa iyang bana. “Maayo na si Uray Masing kay karaang mananabang...”

“Nganong kana mang tiguwang nga mananabang nga duna man tay mga batan-ong midwife nga gidestino diha sa Barangay Hall,” mora’g wala makauyon si Undoy sa gusto sa iyang asawa. Magsakitsakit na man gud ang tiyan ni Milay ug karong bulana mao ang iyang ipanganak.

“Si Uray na lang gud, Undoy,” mora’g namugos si Milay.

Wala motingog si Undoy. Alang kaniya dili siya gusto kang Uray Masing kay gidungogdungog ra ba kini nga nangabat didto sa may kinasang-ang dalan paingon sa baybayon. Magtuwad kuno ang tiguwang ug unya namugno didto sa may utlanan sa katunggan.

Nianang pagka-gabii may nabati si Undoy nga tingog sa wakwak nga mora’g nagbahisbahis ug tayming usab nga nagbati na si Milay. Gisakitan kini pag-ayo. Ug kay layo man ang Barangay Hall nakahukom si Undoy nga si Uray Masing na lang ang iyang kuhaon. Duol ra man ang balay sa tiguwang. Tuod, nanaog dayon si Undoy ug pag-abot niya sa unahan og gamay may misugat niyang tiguwang. Si Uray Masing. Bisa’g dulom ang gabii nakaila si Undoy niini.

“Uray Masing, maayo kay nasugatan tika,” ni Undoy pa. “Maayong gabii nimo, si kuan man gud si Milay nagbati...”

Nakadungog bitaw ko, tana, ato siyang adtoon,” ni Uray Masing pa nga nagkalkag ang buhok. Midali dayon sila’g lakaw paingon sa balay. “Ayayyyy! Undoyyyyy, dili na maagwanta! Sakit na kaayo..mora’g manganak na ko!” Kusog kaayo ang tingog ni Milay nga gisakitan. Ug kay diha na man si Uray Masing nakaanak gyud si Milay. Usa ka himsog nga lalaki ang panganay nilang anak. Ug human niya hatagi’g isip bayad sa serbisyo ang tigulang mananabang, nagpasalamat si Undoy kang Uray             Masing.

“Undoy, abi nimo he, he, he dili ko mangunay og silingan uy, busa, ayaw og kabalaka, way mahitabo sa imong anak. He, he, himsog siya,” ni Uray Masing pa nga mipahiyom ug misiwil ang tag-as niyang mga tango. Nakita kini ni Undoy nga nakuyawan.

“U-Uray Masing gitugkan ka’g mga tag-as nga tango!” Miatras si Undoy. “Wala na man unta kay mga ngipon, di ba?”

“He, he, he, bitaw, Undoy, sige, biyaan ta una ka ug salamat ining bayad, ako lang ning dawaton kay wala koy bugas sa balay,” ug nagdali si Uray Masing nga nanaog sa balay nilang Undoy. Unya nakita ni Undoy nga milupad si Uray Masing. Nangurog si Undoy sa kahadlok apan kalit lang sab nga nahanaw dihang nabati niya ang uha sa ilang panganay nga anak nga lalaki ni Milay. Sa hunahuna ni Undoy dili gyud diay mangunay og silingan ang ungo, dili gyud. (Kataposan)