Ang kampeyon nga way bakus

"Coach, tabangi ko, hapit na gyud mahurot ang akong pondo," matud sa gikaintapang boksidor nga si Alisto, "basin ning higayona, duna nay moparang kanako."

"Tana, mangadto ta sa atong promoter."

Apan pag-abot nila sa balay niini, "Sa pagkakaron, mangita pa kita'g kinsay mosukol nimo pero kun gusto mo nga karon dayon, may laing remedyo apan delikado lang."

"Asa man, unsa man diay na?" Sa coach nga midiyong ang mga mata.

"Boksing na sa mga sindikato. Way bakusay, eksibisyon lang. Kun mapatay ka, tabla apan kun ikaw ang makapatay, bayad ka'g danyos.

"Ahh! Di ko motugot ana," sa coach pa.

"Sige, "sa boksidor pa, "mosugot nalang ko, basta may kuwarta. "Bueno, ipahigayon dayon nato ang imong sangka."

Human sa maong sangka "Alisto, may dakung problema. Wa matabang ang kasangka mo, tua gidala na sa morgue" sa promoter. "Daku ka'g bayranan, kay kulang pa ibayad ang imong dawatonong premyo."

"Haskang demalasa ani," ni Alisto nga nagpanlingo, "imbis makakuwarta, nautangan na man hinoon ko."

Kining problema ni Alisto, nakadangat sa laing promoter.

"Bueno, papirmahe ning kontrata, ako’y mahibawo sa imong batus, himoon nato siyang bilyonaryo." Sa promoter ngadto sa iyang coach.

Sukad niadto, wala nay puas ang sangka ni Alisto. "Basta mopasaka ka lang sa imong timbang, aduna ka pay daghang sangka sa umaabot." Ang tambag sa bag-ong promoter ang kanunay niyang gisunod. Halos nailog na niya ang ubang mga bakus.

Usa ka higayon ana, "Mabuhay si Alisto," hugyaw sa mga Pinoy, kay nailog na pod niya ang ika-walong bakus. Gipasidunggan siya'g bangkite sa mga higala. Unya may kalit nga babaye nga migakos ug mihalok sa atong bida.

"Bantay ka lang, ig-uli nimo," sa asawa nga nagtan-aw sa TV. Pag-uli ni Alisto sa Pinas, wala kini maglangan, mideretso kini sa lawak nilang magtiayon.

"Unsa man! Daghan man kaayong babaye nga naggakos-gakos nimo nga nakita ko sa TV, wa ka gyud matagbaw nako? Tingali'g molunga ka ron ha?"

Pagkaugma may mga bisita si Alisto.

"Uy, naunsa ka man - hilabihan mang bun-oga sa imong nawong? Kinsa may imong naka-engkwentro?"

"Ang akong asawa nga eksperto diay sa judo ug karate. (Katapusan)