Hinog sa punoan

Gula 57

Wala gihapon motingog si Urielle. Apan kombinsido siya sa gisulti ni Patrick. Tinuod nga nabag-ohan siya sa dagan sa iyang kinabuhi karon uban kang Patrick. Tungod ba kaha kay wala sila makasinati sa proseso sa engagement mao nga bation niya ang kataha ug kabakikaw sa pagpakig-uban kang Patrick?

Lahi man gud kining nahitabo kanila kay sa ubang kaminyoon. Kinasal na sila apan anaa pa sila sa getting to know each other stage. Angay unta nga mahitabo kini sa panahon sa pagpangulitawo ni Patrick kaniya. Apan wala sila mag-agi og courtship mao nga ingon niini ang nahitabo kanila karon.

“Maanad ka ra lagi sa kadugayan,” ni Patrick pa. “Ipasalig ko nimo nga di ka magmahay sa imong pagpakasal nako. Hinuon, isipon mo kining usa ka nice experience nga nahitabo sa imong kinabuhi.”

Wala siya motingog. Ug gitibawas nila ang pangaon.

Human sa usa ka semana nga honeymoon sa hotel, didto na sila si Urielle ug Patrick mipuyo sa balay sa mga Arcanghel sa Busay. Hamugaway ang maong balay. Dos andanas kini ug nahitarok sa lapad nga lote. May luag kini nga garahe nga kapahilunaan sa kaugalingong sakyanan ni Patrick.

Hangtod niining higayona sa ilang panagtipon wala pa gayo’y nahitabo tali kanila ni Urielle ug Patrick. Sa hilom mibati og kahibulong si Urielle kun nganong wala gayod mangahas si Patrick sa pagtandog sa iyang pagka-babaye. Ang uban ganing mga lalaki gusto man og premarital sex. Pero lahi si Patrick tungod kay bisan minyo na sila apan wala pa gayod niini kutloa ang gihay sa iyang kaputli. -- Sumpayan pa