Estoryahe!

Gula 2

Usa ka adlaw, gitawgan si Mike sa iyang higala nga gwardya sa Land Transportation Office (LTO).

Nagpahibalo kini ni Mike nga dunay nangita kaniya nga babaye didto sa opisina. Nagtuo si Mike nga usa kini sa iyang dinakpan ug buot lang moreklamo nga siya gidakop.

“Mike, mangayo sa imong contact number, unsa akong hatagan?” pangutana sa gwardya. “Wala’y problema, hatagi lang,” dali nga tubag ni Mike.

Taud-taud, mitingog g’yud tuod ang ring tone sa cellphone ni Mike ug ang numero wala marehestro sa iyang phone book. Gitubag dayon ni Mike ug iya nga nasayran nga babaye ang nanawag.

“Sir Mike, si Atty. Geraldine kini, kadtong imong gidakop ba didto sa M. Velez kaniadtong Biyernes sa gabii, nahinumdom ka pa ba?” paraygon ang tingog sa babaye.

Wala malimot si Mike. Nakulbaan siya pagkasayud nga abogado diay kadtong babaye nga gwapa nga iyang nasakmitan sa lisensya tungod kay nag-drive og kotse nga usa ra’y suga.

“Yes… Atorni.. nahinumdom ko, abogado ka diay? Trabaho ra g’yud ang akong gihimo atorni kay tinuod man g’yud nga wala magsiga ang suga sa imong sakyanan atul sa akong pag-apprehend,” kalma kaayo si Mike.

“Mao kana nga gusto ko nga magkita kita. Dia na kanako ang akong lisensya, nalukat na nako bisan daku kaayo ang multa. Asa kita magkita?” sukot sa abogada.

Gipangutana ni Mike si Geraldine kun nganong makigkita siya kaniya. “Unya na lang pangutana Sir Mike,” mubo nga tubag sa babaye. “Sige Atorni, anha ko karon sa opisina,” matud ni Mike.

“Adto na lang kita magkita sa lobby sa Waterfront Hotel alas utso unyang gabii kay may pakigkitaan ko nga kliyente didto mga alas siete. Kita ta didto. Mao kini ang akong cellphone number,” matud ni Geraldine.

Daw miduyog ni Mike ang panahon. Nag-uwan ug wala madayon ang ilang operation sa atubangan sa CIT University adtong miaging semana. Sayo siya nga miadto sa Waterfront.

Nabatasan na ni Mike nga kun duna siya’y ikatagbo, mag-una g’yud siya apan dili dayon magpakita. Gusto niya nga aninawon usa ang palibut kay naanad siya sa batasan isip intelligence agent.

Didto sa lobby magpahimutang si Mike aron makita niya ang mga tawo nga tua sa lobby. May nakita siya nga babaye’g lalaki nga nag-atubang sa lamesa ug naghikyad og mga dukomento.

Nahandum ni Mike nga ang maong babaye tukma kaayo sa bayhon niadtong iyang gidakop sa operation nila sa LTO didto sa M. Velez. Taud-taud mitindog ang lalaki sa lamesa ug gibiyaan ang babaye. (Sumpayan)