Anino sa kulto

GULA 139

Tuod, nakita niya ang giingon sa iyang iyaan. Usa ka awtong abohon ang nag-urong sa daplin sa karsada. Nadan-agan kini sa kahayag sa sugang dagitabnon sa poste sa atbang.

“Nakita ba nimo, Dong?” ni Tiya Marta nga nagkurog ang tingog kay ingon sa gitay-og kini sa kahadlok. Misunod diay kini kang Carlo pagduol sa bentana.

“Oo, Tiya,” maoy tubag. “Apan wala manganaog ang mga nagsakay. Mora’g naniid lang dinhi.”

“Lagmit nga nasundan ko nila sa akong pagpaingon dinhi,” nagkanayon si Tiya Marta nga giduyan sa kabalaka.

Wala madugay, nakita ni Carlo nga miaginod ang sakyanan. Hangtod nga nalayo na kini tungod sa balay.

“Unsay buhaton ta karon, Dong?” ni Tiya Marta nga giyunyonan sa kabalisa.

“Karon dayon mamiya kita dinhi, Tiya,” daling hukom ni Carlo. “Unya na lang nato kontaka ang kapolisan kun atua na kita sa inyo.”

Hingpit nang hikalimtan ni Carlo ang iyang panihapon. Nagdali sila pagpanggawas sa balay. Giserad-an pag-ayo ni Carlo ang pultahan sa balay. Wala niya palonga ang sugang dagitabnon sa gawas sa balay nga maoy naghayag sa tibuok lagwerta. Giserad-an usab niya’g maayo ang gate human ikapagawas ang sakyanan.

Sakay sa kaugalingong awto nga gipangunayan pagmaneho ni Carlo, namiya dayon sila si Tiya Marta sa iyang gipuy-an.

Nagsiga ang tanang mga suga sa sulod ug gawas sa balay nila ni Tiya Marta sa ilang paghiabot. Sa sala, ilang natukmaan sila si Tiyo Berto, Belen ug Jimmy nga nanaglingkod sa sopa. Mitimbaya si Carlo kanila. Nangayo’g katahoran nga gibalosan usab sa tulo.

“Hain man diay si Agaw Arlin?” gipangita ni Carlo ang maguwang ni Belen dihang wala kini niya makita sa sala.

“Tua sa kuwarto, Gaw,” si Jimmy, ang bana ni Arlin, maoy mitubag. “Kauban si Inday Shantal.”

“Naunsa man kining hitaboa?” may kahingawa ang tinan-awan ni Carlo nga mitutok kang Jimmy. -- Sumpayan pa