Mogula matag biyernes duha ang gihigugma

Kun ikiha gyud ko ninyo’g bigamya kay ipapriso, naa ra ninyo. Pero hunahunaa una ninyo kinsay nagbuhi sa atong pamilya," mapaubsanong pulong ni Romeo samtang naglingkod sa katre sulod sa lawak sa ospital diin na-admit siya’g lima ka adlaw. Nagbarog sa iyang atubangan iyang duha ka asawa nga sila si Abeth ug Delia.

Mo-check out na siya sa ospital karong hapona human gitahi iyang samad sa agtang kay napantok sa dashboard sa taksi iyang gimaneho. Nakatulog siya samtang nagdrayb unya nadasmag sa poste. Gipa-CT Scan iyang ulo, sa iyang amo. Pasalamat siyang way internal injury.

Bag-o lang nahuman og bugno sila’s Abeth ug Delia. Nagkagusbat ilang mga sinina. Nangakalkag ilang mga buhok. Kay karon nga gumagawas na sa ospital si Romeo, nag-abot hinoon iyang duha ka asawa. Unang niabot si Abeth aron pag-asikaso sa iyang bana.Unya niabot sab si Delia kay moasikaso sab sa bana. "Mao diay ni imong kabit nga nadungog nako sa mga komedya-komedya sa imong mga higalang drayber?!" ni Abeth. Siga kaayong mga mata nga nagtulisok ni Delia. "Unsay kabit? Ikaw ang kabit kay kasado mi ni Romeo!" ni Delia. Nisingka sab ug nitulisok sa nauna. Nagsambunotay dayon sila. Naglarutay sa buhok. Nagsinagpaay. Naglayog ug nangatumba sa sawog.

"Hunong mo! Di ko gustong dunay madisgrasya ninyo! Puro ta mo gipangga ug gihigugma. Way kabit ninyong duha. Puro ta mo pinakaslan. Di ba Abeth kasado ta sa huwes sa Compostela? Unya kita Delia kasado sab ta sa huwes sa San Fernando?" ni Romeo. Nanglipaghong nga nagtibi. Nahanaw ang kalagot sa mga babaye batok sa usa’g usa. Nanindog sila. Unya gitarong ilang nangahiwi nga sayal ug blawos. Gihapsay ilang mga nangakalkag nga buhok. Nagtinan-away sila. Unya nagdungan og tan-aw kang Romeo. Tabangan unta nila’g sagpa si Romeo. Apan nanagang siya. Ug namulong "Paminawa una ko ninyo!"

Tinood nga gipakaslan gyud niya ang duha ka babaye. Nagpuyo sila si Abeth sa Compostela. M-W-F siya mohigda sa Compostela. May tulo sila ka anak. Naa na’s elementarya. Puro lalaki. T-T-S siya mohigda sa San Fernando diin nagpuyo sila ni Delia. May tulo sila ka mga anak. Puro babaye nga naa na’s elementarya.

Kay ang taxi driver 24 hours ang serbisyo, way kalibutan ang masig ka asawa nga tua diay higda sa laing balay iyang bana sa mga panahong wa niya ikadulog. Kun Domingo, diskarte na ni Romeo kun asa siya. Iya sang banusbanusan. Primerong semana sa bulan, sa Compostela siya. Sunod nga weekend sa San Fernando siya. Moingon man lang siya "Dunay mopaekstra nako’g drayeb!" Too lang ang asawang buotan ug inosente kaayo.

Si Delia ang iya gyung uyab nga tunay sugod pa sa hayskul. Silingan ug kababata sila. Si Abeth suki niya nga pasahera sa nagtrabaho pa sa Mitsumi. Nadebelap. Unya pagkamabdos, gipaundang na niyag trabaho si Abeth. Gipakaslan sab niya aron dili ma-illegitimate ang bata.

"Nag-abot na man gyud mong duha. Ang pangutana nako, salbahis ba kong pagkabana ninyo?" ni Romeo. Nagbalhinbalhin og tan-aw sa wala’g too. Si Abeth nagbarog sa iyang wala. Si Delia nagbarog sa iyang too. "Palahubog ba ko?: Namon-og ba ko ninyo? Nanagmal ba ko’s mga bata? Bisyoso ba ko?" Iresponsable ba kong pagkabana?" ni Romeo. Nangluspad. Minghoy.

"Kinsa may una nimong gipakaslan namong duha?" ni Abeth ug Delia. Hapit sila nagdungan og pangutana. "Si Delia" ni Romeo. "Sorry ha, ikaw diay original" ni Abeth ngadtong Delia. Mapaubsanon. Nisugod og hilak si Abeth. Nitalikod. Nilakang padulong sa pultahan. "Ayaw una’g lakaw Abeth. Ato lang una ning istoryahan," ni Delia.

Ug nagkasabot sila nga as is na lang ang situwasyon. Di nalang pahibaw-on ang mga bata. MWF, Compostela si Romeo. TTS, San Fernando. Domingo, ekstraekstra. Tinood gyud ang pagya nga "Driver                 perfect lover" (Kataposan) (Kining sugilanona basi sa tinood nga hitabo. Nakasakay ang tagsulat sa taksi nga gimaneho sa karakter ni Romeo. Iya ning sugilanon - Tagsulat) (Sa gusto’g libreng konsulta, dad-a ning pahina sa opisina sa tagsulat. Iatol og  Sabado)