Pangabubho

Nahasiga ang mga mata ni Fredmon sa iyang pagkakita sa babaye ug lalake nga nanganaog sa taksi. Daw gikumot ang iyang kasingkasing nga nagtan-aw sa duha nga nanglakaw.

Ang kamot sa babaye hugot nga mibilikis sa hawak sa lalake ug ang bukton sa lalake daw hangol nga bitin nga mibalikos sa hawak sa babaye. Malipayon kaayo ang duha nga nanglakaw. Gitan-aw pag-ayo ni Fredmon ang babaye. Mao gayod si Luz nga iyang asawa.

"Animal! Kamaluibonnnn!!!" ni Fredmon pang nagkagot ang mga ngipon. "Duha pa lang gani ka adlaw ang milabay sa among kasal nakig-date na og Amerikano!"

Inay mohapit sa merkado aron sa pagpamalit og mga prutas nga ampay ni Luz mideretso siya sa imnanan human mahanaw sa iyang panan-aw ang duha ka binuhat. Miorder siyag long neck nga bino ug gilumsan ang iyang pagbati pinaagi sa paghubog. Samtang nag-inom giliraw ang iyang panan-aw sa mga tawong nangagi. Kutob sa iyang mga higala iyang tawgon ug paimnon.

"Milagro man, bay?" tuaw ni Rey, ang una niyang nahawiran. "Sukad masukad karon pa mahitabo nga ikaw moinom. Ngano man? May problema ka ba?"

Nanghupaw og lawom si Fredmon. Unya ... "Duna, bay," masilagong tubag ni Fredmon.

"Unsa mang problemaha?" dason ni Ronie.

"Bahin sa akong asawa. Nagbudhi! Amerikano pay iyang gipili!" ug gibusdak ni Fredmon ang baso. "Porbida, wa ko magdahom nga makahimo siya sa ingon," ug giyarok ni Fredmon ang baso. Unya, miipis siya ug gihatag kang        Rey.

"Hala, inom. Adiay daghan kong kuwarta! Suweldo nako karon. Gikan sa trabaho mihapit ko dinhi kay mamalit unta og mga prutas nga naayonan ni Luz. Apan nakit-an ko siyang nakigkuyog sa Amerikano. Busa, bahala kang prutasa ka! Hutdon ta 'inig inom! Hala, tagaaayyyy!" ug miorder na usab si Fredmon og laing long neck nga bino ug usa ka litro nga soft drink.

Labihan nang huboga ni Fred nga mipauli niadtong gabhiona. Sakot atras na ang iyang mga lakang.

"Bunooo!!!" nagpaningggit si Fred sa iya nang pag-abot sa tugkaran sa ilang panimalay.

Nagdagan nga misugat ang iyang asawa.

"Naunsa ka, Fredmon?" sa asawa pang miagak sa pagpasaka. Nagkadusmo-dusmo si Fredmon nga misaka sa hagdanan.

"Ayaw kog guniti, maluibon!" ni Fredmon pang misawilik sa asawa.

"Maluibon?" ni Luz pang naningkamot sa pag-agak.

"Ikaaawww!!!" gitulisok ni Fredmon ang iyang asawa. "Maluibon kang dako!

"Nganong nakasulti ka man niana?" ni Luz pang nahigangha.

"Nakit-an ta ka nga pilit pa sa tiki nga migakos sa hawak sa Amerikano didto sa merkadooo!!!"

"Nakit-an? Wa man ko molakaw! Ah, kining akong kaluha ang imong nakit-an!" ug giguyod ni Luz si Fredmon paingon sa sala. Didto nahiugnok na usab si Fredmon sa pagkakita sa babaye ug sa Amerikano nga iyang nakita didto sa merkado. Nanindog sila ug nanglamano kaniya.

"Porbida, Fred, wa 'mi makaanhi sa inyong kasal ni Luz kay way biyaheng ayroplano. Nagbagyo sa America. Tulo gayod ka adlaw nga nagdaot ang panahon. Karon pa kami makaanhi!"

"Kini si Daizy, Fred, ang akong kaluha. Nagtrabaho siya sa America ug didto naminyog Amerikano. Kining iyang kauban mao si Frits nga iyang bana."

Bisan sa tuman niyang kahubog ingon sa gitamparos siyag buang. Gisud-ong niya si Daizy ug gitan-aw si Luz. Wala gayoy kalainan ang kaanyag, gidak-on sa lawas, pamanit ug kandiis. Nalun-oy si Fredmon.

"Fred, hain man ang mga prutas nga gipapalit ko nimo?" ni Luz pang naghinam sa ampay niyang mga bungahoy.

"Ugma na lang, Day, nakalimot ko," ug gitagad ni Fredmon ang iyang mga bisita. (Katapusan)