Hinog sa punoan

Gula 48

Nakignat si Urielle sa dihang nabati niya ang pagkaabli sa pultahan sa lawak nga iyang nahimutangan. Misantop sa iyang hunahuna nga si Patrick na ang misulod. Nagbukot siya sa habol. Nagpakaaron-ingnon siya nga natulog apan nagpaniid siya sa palibot.

Wala madugay, namatikdan niya nga dihay milingkod sa ngilit sa kama nga iyang gihigdaan. Gibasal sa tumang kakulba ang iyang dughan samtang nagpaabot sa sunod mahitabo. Unya nahaigking siya dihang may kamot nga midapat sa wala niyang abaga ug giuyog kini. Nagtuo gayod si Patrick nga natulog na siya ug gipukaw siya niini.

Mihinay siya paglihok. Nagpadayon siya sa pag-inartista nga nagpakaaron-ingnong gikang natulog ug nahigmata na. Iyang gitukas ang habol nga iyang gibukot sa iyang lawas ug nawong. Nagkasugat ang tinan-awan nila ni Patrick.

“Kasayo ba nimong natulog?” Nagkanayon si Patrick nga nagpahiyom. “Wa ka na lang gani manihapon.”

“Unsa na ba diay rong orasa?” Nangutana siya.

“7:30 pa. Manihapon na ta. Gusto ka nga magpa-room service na lang ta?”

“Ikaw?” Si Patrick ang iyang gipahunat.

Gikab-ot ni Patrick ang menu nga gipatong sa usa ka gamay’ng lamesa habig sa ulohan sa kama nga gihigdaan ni Urielle. Gitamdan niini ang listahan sa mga pagkaon. Unya gikab-ot niini ang awditibo sa telepono ug gidayal ang mga numero alang sa room service. Mi-order si Patrick og mga pagkaon alang nila ni Urielle. -- Sumpayan pa