Anino sa kulto

Gula 130

Naapsan gayod niya ang lalaki nga hapit na makagawas sa merkado. Ug nasuta niya nga wala gayod siya masayop sa iyang nakita dili pa lang dugay. Pinaagi sa x-ray sunglasses nga iyang gisul-ob, milapos ang iyang tinan-awan sa polo nga gisul-ob sa lalaki. Ug nabasa niya ang marka nga 666 sa bukobuko niini.

Natibuok gilayon ang katahap ni Carlo nga ang maong lalaki sakop sa Tambayawan Black Brotherhood. Kadali ra siyang nakahunahuna sa angay niyang buhaton. Mipadayon siya sa pagsunod sa lalaki. Nangita siya’g maayong higayon nga iyang mabuhat ang diha sa iyang hunahuna.

Apan ang lalaki nga iyang gisundan nakalingi dihang nabanggaan kini sa babaye nga gikasugat nga kusog nga naglakaw. Gisundan niini’g tan-aw ang babaye nga misaylo. Ug nagkasugat ang mga mata nila ni Carlo. Ingon sa nakaila kini kaniya ug mipaspas sa paglakaw.

Miagpas si Carlo sa tawo nga daw buot molikay kaniya. Apan ang tawo abtik usab. Midali kini pag-ipon sa daghang mga tawo ug nalipat siya. Nalukop ni Carlo pag-aninaw ang palibot apan wala na gayod niya makita ang bayhon sa tawo nga iyang gisundan.

Anugon, nakatuaw si Carlo sa hilom. Mao untay iyang plano nga kun makahigayon siya, iyang apikihon ang tawo. Pasakyon niya kini sa iyang awto ug dad-on sa kuwerpo sa kapolisan aron sukit-sukiton. Hugot ang iyang pagtuo nga ang maong tawo may kasayoran gayod mahitungod sa kulto gumikan sa patik sa bukobuko niini nga iyang nakita. Ang patik nga 666 maoy ilhanan sa Tambayawan.

Mibalik na lang si Carlo sa nahimutangan sa iyang awto kay wala na gayod niya igkita ang lalaki. Misakay siya ug gipaandar ang makina. Nakahunahuna siya nga moadto sa plasa. Dihadiha gipadagan niya ang sakyanan.

Samtang nagdagan ang sakyanan, ang mga mata ni Carlo nagkinagang sa daghang mga talan-awon. Sukad siya nahiabot dinhi sa Mabini nga usa na ka detektib, karon pa siya makasuroy sa ilang lugar nga wala magdali. Relaks ang iyang hunahuna. Nanan-aw tan-aw siya sa kabalayan nga iyang hipanglabyan. -- Sumpayan pa