Hinog sa punoan

Gula 46

Ang reception sa kasal nila ni Urielle ug Patrick gipahigayon sa luho ug hamugaway nga Castle Peack Hotel. Didto gidalit ang lamian ug makabusdik nga mga pagkaon. Alegre kaayo ang okasyon.

Hangtod sa pagpangaon nagpadayon usab ang kinidlap sa mga kamera. Nag-hire ang amahan ni Patrick og tawo nga maoy mokuha’g video sa okasyon, sukad sa kasaulogan didto sa simbahan hangtod na sa reception.

Hangtod sa sulod sa reception nagpadayon ang pagpahalipay sa mga tawo sa bag-ong magtiayon. Gipaila ni Patrick si Urielle ngadto sa mga kabanay niini, sa habig sa amahan ug inahan niini. Wala usab ma-out of place ang mga kabanay ni Urielle. Gitagad sila’g maayo sa mga kabanay ni Patrick. Ang amahan ni Urielle didto molingkod tupad sa amahan ni Patrick. Ang iyang inahan gipakighinabian usab sa inahan ni Patrick.

Malipayon si Urielle. Nagsud-ong sa katawhan nga nanambong sa kasal nila ni Patrick, wala siya magdahom nga mahitabo kini sa iyang kinabuhi. Wala gayod siya magpalandong nga ingon niini ang mahitabo sa iyang kaminyoon.

Sa samang hotel may gireserba nang lawak alang nila ni Urielle ug Patrick. Anhi sila dinhi moistar alang sa usa ka semana nilang honeymoon. Human sa usa ka semana, adto na sila mopuyo sa Busay nga kaniadto gihimo rang bakasyonan sa pamilyang Arcanghel.

Dangtan og pipila ka takna, nananghid si Urielle kang Patrick nga mopahuway una siya sa ilang lawak. Gikapoy siya pagpakigtimbayahay sa mga tawo, nga nanambong sa ilang kasal. -- Sumpayan pa