Ang girlboy nga may tumoy

Bag-ong Mayor sa lungsod si Bambi. Ambongan ug medyo posturawo siya. Gawas nga ambongan, may pagka-utokan ug maantigo pa. Ulitawo sab siya. Ang nakaparat lang kay hilig sa badyikdyik. Basta tsiks, hala bira....!

"Nyot, karong alas-otso sa gabii, adto ta sa inagurasyon sa Club Florida kay ako ang moputol sa Ceremonial Ribbon...!" Sangpit sa Mayor ngadto kang Tonyo nga naglimpiyo sa kotse. Onyot ang tawag ni Mayor Bambi kang Tonyo nga iyang drayber. Managhigala ug pulos ulitawo sab sila. Mora'g managsama ang ilang ampay ug mao nga hapit na sila lakdi sa adlaw....!

Human sa seremonyas, misunod sab dayon ang Ballroom Dancing. Kiat lang ang karansa sa nanambong. Matag ilis sa sonata, lainlain sab ang sadsad. Sadya kaayo ang hawanan sa Club Florida niadtong gabhiona....!

Didto sa suok, nakita ni Mayor Bambi ang badyikdyik nga nag-inusara sa lamisa simpig sa Dark Room. Bawog ang mga pilok. Mamords. Namatikdan sa Mayor nga mobalibad kining badyikdyik sa matag moduol kaniya kay makigsayaw. Nasigpatan sab sa Mayor nga ingon sa nagpangidhat ang tinan-awan sa badyikdyik ngadto kaniya. Gisulayan pagduol niya ug gihangyo nga makigsayaw. Way balibad ang badyikdyik ug gani nagpahiyum nga misugot sa hangyo sa ulitawong Mayor. Hanas halos sa tanang sayaw ang iyang kaparis nga way tingotingog nga moikid sa Hot Music...!

"Sa iyang ikid, patay na ko....! Aguyyyy, unsaon na lang...?" Nagpanilap sa kahinam nga namulong ang Mayor ngadto kang Tonyo dungan ang pag-ipis sa VODKA nga giaray ibabaw sa lamisa.

"Sayon 'ana ahhhh...! Dad-a sa Dark Room kanang mamords nga badyikdyik. Pahangin mo didto...!" Tambag ni Tonyo nga migiswid ang simod nga nagyarok sab sa VODKA. Natandog tuod ang hilig sa Mayor....!

Ang Dark Room nahimutang kinatumyan sa Club Florida nga medyo ngitngit diyutay. May higdaanan kining giandam alang niadtong magpahimulos sa higayon. Ingon sa Romantic kaayo ang palibut sa Dark Room....!

Sa sunod nga sonata, giduol gihapon sa Mayor ang badyikdyik ug way ungol nga nagsayaw sila. Wa pa gani matapus ang Music, nakita ni Tonyo nga misulod ang Mayor sa Dark Room uban sa badyikdyik. Ug nasabtan na ang pagabuhaton nila. Pila ka gutlo, nabati ni Tonyo ang linagubo sulod sa Dark Room. Mora'g nagsinumbagay!!! Unya, may mihagsa sa ubos. Taudtaod, migawas si Mayor Bambi nga may bukol sa agtang.

"Tana Nyot, pauli na ta....!!!" Matud pa sa Mayor nga namahid sa iyang agtang.

"Hain man ang imong mamords....?" Pangutana ni Tonyo kang Mayor Bambi.

"Pasagdi 'tong kanahan nga nag-aguroy sa ubos. Nagsulti pa siya...... di unta ko mahinayak!!!!" Nangusmo sa kapungot ang ulitawong Mayor nga wa gani mananghid.

Bayot diay kadtong badyikdyik nga naibgan ni Mayor Bambi...., hehehehe! Lagi kay abtik sa tsiks, nasugamak hinoon ang Mayor sa girlboy nga may tumoy! (Katapusan)