Tsiks killer

Nabantayan ni Mar nga samtang pabilin niyang gitandayan ug gigakus si Vivian, naghinuktok ang dalaga. Gipunting niini ang iyang panan-aw sa kisame sa kwarto sa motel nga ilang gisudlan.

Gisukna ni Mar ang dalaga kun nagmahay ba kini sa pagtugyan kaniya sa iyang pagkababaye.

“Wala man, wala ko magmahay Mar, apan gihuna-huna lang nako ang kapaspas sa panghitabo. Bag-o pa kita nga nagkaila ug wala pa nako masinati ang imong pagkatawo, unya gitugyan ko na kanimo ang tanan,” ni Vivian pa.

Nasabtan ni Mar ang buot ipasabut sa hinigugma niyang medical student. Nabalaka kini nga human niya gikatugyan sa radio announcer ang iyang pagkababaye talikdan na siya niini.

Diha sa huna-huna ni Vivian nga tsiks tirada g’yud ang mga announcer sa radio tungod kay daghan man g’yud ang               mo-idolo kanila sa ilang mga tigpaminaw.

Giam-aman ni Mar ang batan-ong medical student. Dayon gipakaligo na usab sa iyang mga matam-is nga hawok. Nanginit na usab ang ilang kalawasan ug misangpot na usab sa laing kumbati sa kama.

Nahitabo na usab silang duha. Mora’g wala kapuya si Mar kay diha sa iyang huna-huna nga swerte kaayo siya nga gitugyanan sa kaputli sa maanyag nga tinun-an sa pagka doktor.

Hapon na nga gihatud ni Mar si Vivian sa ilang balay diha sa Gonzales Compound sa barangay Camputhaw.

Mipaturatoy si Mar pagpadagan sa iyang motor paingon sa estasyon nga iyang gitrabahoan. Kay Domingo lagi nagdali si Mar kay emcee siya sa amateur hour nga anaa gihimo sa plaza sa Fort San Pedro.

Wala niya damha nga gikakita niya si Charisse, ang usa sa iyang mga tigpaminaw sa programa nga nakapadani usab kaniya.

Mitukar na usab ang pagka- tsik boy ni Mar. “Ikaw ra ba usa Charisse? Ihatud tika inigpauli nimo, pwede?”

Igo lang mipahiyom si Charisse. Nagtuo si Mar nga gibaliwala ra ni Charisse ang iyang tanyag.

Apan human sa amateur hour, nabantayan niya nga wala mobiya si Charisse sa gilingkuran niini atubangan sa stage. Ingon sa nakamatikod si Mar nga gusto sa dalaga nga magpahatud kaniya.

“Tana Char, adto usa ta sa estasyon kay tua nako gi-parking ang akong motorsiklo. Mosakay ka ba’g motor?” gisukna ni Mar si Charrise.

Dihang nakalingkod na si Mar sa motorsiklo ug napaandar na niya ang sakyanan, miangkas dayon si Charisse. Nabantayan ni Mar nga lahi sa ubang babaye, si Charisse daw mipilit dayon sa iyang buko-buko. (Sumpayan)