Gula 41
Nasuta ni Urielle nga ingon sa wala pa gayod makabalita si Nelson nga kaslunon na siya ngadto kang Patrick, ang anak ni Don Emilio Arcanghel nga agalon sa iyang mga ginikanan. Mao nga dihang nakabaton na siya’g igong kaisog sa pagsulti sa matuod, gisuginlan niya si Nelson sa tanan. Gipasabot niya ang ulitawo kun nganong nakahukom siya sa pagpakasal kang Patrick.
“Tungod ba sa kuwarta, Urielle,” may kahimangod ang sinultihan ni Nelson nga nanukmat,” mao nga magpakasal ka kang Patrick?”
Nasayop ka, Nelson,” matud ni Urielle nga daan nang nasayod nga makugang gayod si Nelson ug maglisod pagdawat sa kapakyasan sa ilang gugma. Dili ang ilang kuwarta ang akong giapas. Naluoy lang ko sa akong mga ginikanan.”
“Wa ko magdahom nga mao diay kini ang mamahimong bugti sa dakong kantidad nga nautang sa imong mga ginikanan ngadto ni Don Emilio,” nagkanayon si Nelson nga nahisagmuyo pag-ayo.
“Pasayloa ko, Nelson,” ni Urielle pa, “nga dili ko makatuman sa atong gikasabotan. Hinaot unta nga makasabot ka sa akong hukom. Kining akong gihimo dili lang para sa akong kaugalingon kundili para usab sa akong mga ginikanan ug igsuon.”
“Dili na ba gayod mausab ang imong hukom, Urielle?”
“Dili na ko makasibog, Nelson. Giandam na ang tanan alang sa among kasal ni Patrick.”
“Apan magmalipayon ka kaha uban kaniya sa higayon nga makasal na kamo? Hinumdomi, Urielle nga dili ang tanang butang nga makalipay mapalit sa salapi.”-- Sumpayan pa