Og napatag ang garbosong bukid

Sir Dadong, naglisod sa pagpanganak ang akong asawa nga si Sebya. Kinahanglan gyod kuno nga masisaryan siya sigon pa sa doktor", pamahayag pa ni Lucio ngadto sa nahauna samtang nag-ihap kini sa kwarta nga halin ning sayong kabuntagon.

"Unya, unsa may tuyo nimo?" Nganong nagpatuga-tuga man mo’g panganak nga dili man ninyo kaya?" tubag pa ni Dadong nga dalag pinahugot ang iyang tingog.

"Kuan god, Sir Dadong, iprinda unta nako sa imo ang gamay kong uma aron masalbar unta to si Sebya sa iyang pagpanganak," sulti ni Lucio.

Mitubag si Dadong, "Aduna koy kwarta apan gamitunon ko kini sa akong negosyo sa tindahan ug sa pagpanindot sa akong balay kay umaabot na ra ba ang pista sa atong dapit!"

Pagkadungog ni Lucio ning mga pulonga mipauli siya nga huyhoy ang iyang mga abaga ug gisundan usab sa iyang nawong nga puno sa kabalisa ug kahingawa kun asa siya padulong nga makakita og kwarta.

Bag-ohay pa lang nga nabiyudo si Dadong gumikan sa pagkamatay sa iyang asawa nga si Tosing sa sakit sa totoy kon breast cancer.

Haruhay ang iyang pagkabutang kay may dako-dako man siya og tindahan sa ilang baryo ug daghan usab siyag mga suki sa kopras.

May kayutaan siya nga adunay tanom nga mga kamaisan ug kalubihan. Apan may pagkasiko ug pagkalaog kini si Dadong usa ka hiyas niya nga wala gyod ikahimuot ug ikalipay sa iyang mga silingan ug mga kahigalaan lakip na ang iyang mga kaparyentihan.

Ultimo ang mga makililimos nga masaag sa pagduol kaniya makatilaw gyod sila sa iyang singhag ug kasaba nga dili makaon og iro. Insultador siya nga pagkamatang sa tawo.

Ang paghatag sab sa suweldo sa iyang mga katabang ug mga trabahante sa iyang tindahan dugaydugayon pa.

Kun mamahin sa abot sa iyang yuta, labaw gyod sa kanunay ang iyaha kumo tag-iya. Usa ka higayon samtang nangasaba siya sa iyang mga sakop gumikan sa pagkahanaw sa iyang singsing nga may dakong bato nga orotsina, mikalit lang og sakit ang iyang dughan, nalipong ug nalup-og siya nga wala lang damha. Gitabang dayon siya sa iyang mga sakop ug gidala sa ospital. Apan walay kaayohan ang iyang sakit mao tong gidala siya ngadto sa usa ka espesyalista nga doktor didto sa kaulohan.

Gumikan niini, dakong salapi ang iyang nagasto hangtod nga nabaligya hapit ang tanan niyang mga kabtangan.

Naluwas si Dadong sa iyang balatian apan pordoy na usab siya karon. Nahanaw ang tanan niyang bahandi ug mga kabtangan ug nagbasol siya sa hilabihan kay natugkad niya karon nga ang Diyos kahibalong moganti niadtong mga maayong tawo apan abtik usab nga mosilot niadtong mga tawo nga dili kaduolan sa ilang isigkaingon sama kang Dadong nga nahisama sa usa ka garbusong bukid nga napatag sa pagpanglabay sa panahon!

Bugtong nahibilin kaniya mao ang iyang balay apan prendado usab sa bangko sa ilang dapit. Wala na siya’y mga sakop ug mga trabahante kay wala na man siya’y ikasuweldo ngadto kanila. (Kataposan)