Hinog sa punoan

Gula 39

“Kun mao kana,” ni Don Emilio pa, “itakda dayon nato ang adlaw sa ilang kasal aron kasugdan na nato ang pagpangandam. Manawag pa sab ko sa United Kingdom aron pahibaw-on ang inahan ni Patrick bahin sa atong gikasabotan aron makapauli siya dinhi sa Pilipinas ug makatambong sa ilang kasal.”

Giplansa sa ilang mga ginikanan ang kasabotan mahitungod sa ilang kasal. Maoy gusto sa amahan ni Patrick nga ang kasal adto ipahigayon sa Sto. Rosario Church sa dakbayan sa Sugbo. Sila si Urielle ug Patrick igo lang namati sa panagsabot sa ilang mga ginikanan.

“Kami nay bahala sa tanan, Pre,” ni Don Emilio pa. “Gikan sa paghikay sa invitation cards, sa pagpatahi sa biste sa kasal ug uban pa, wala na kamoy angay pang hunahunaon nga problema.”

“Daghang salamat, Pre,” matud ni Noy Sidro. “Ug ikaw na lang gyu’y maantigong mosabot sa among kapobre.”

“Ayaw na kamo paghunahuna og ingon niana,” matud ni Don Emilio. “Ang importante mao nga makasal na ang atong mga anak.”

Nianang pagkagabii, samtang si Urielle naghigda sulod sa iyang kuwarto, misulod si Nang Marciana ug nagpahibalo kaniya nga may bisita siya, si Nelson. Kalit lang kaayong gikulbaan si Urielle. Nasayod na kaha si Nelson nga kaslonon na sila si Patrick? Kun wala pa, kinahanglang sultihan na niya sa matuod ang ulitawo aron dili na kini maglaom pa kaniya -- sa ilang gugma. -- Sumpayan pa