Tsiks killer

Gula 31

“Paraygon ka man diay kaayo Mar,” giingnan ni Vivian ang hinigugma niya nga radio announcer samtang nag-unlan kini sa iyang paa. Gihapyod-hapyod ni Vivian ang buhok ni Mar.

Hinay nga gigunitan ni Mar ang aping sa dalaga, dayon iyang gihangyo. “Kiss ko bi,” ni Mar pa sa daw paraygon nga tingog. Miyuko si Vivian ngadto sa nawong ni Mar aron magkadapat ang masig nila ka mga ngabil.

Nag-ukobay na usab ang mga ngabil nila ni Mar ug Vivian ug parehong gitagamtam nila ang katam-is sa gugma. Wala gayud magdahum si Mar nga ingon niini ka “bigay” si Vivian kaniya.

Human sa ilang pag-ukobay sa masig nila ka ngabil, gibati ni Mar ang grabeng kalalim sa iyang pagbati. Gitul-id niya pag-ayo ang iyang lawas, gituskig ang mga tiil, dayon mitakilid siya nga nag-unlan ra gihapon sa paa sa dalaga.

Niining higayuna didto na sa may pus-on ni Vivian ang nawong ni Mar samtang ang tuo niya nga kamot gipabalikos niya sa sampot sa dalaga. Mitutok lang kaniya si Vivian nga padayong mihapuhap sa iyang buhok.

“Kalami g’yud kaha Vian no kun magkauban kitang duha sa pribadong lugar,” daw nagpalabtik-labtik na og sulti si Mar kang Vivian nga gusto niya kini nga ika-uban sulod sa motel.

Nagtoon sa pagka doktor si Vivian mao nga dili siya ignorante sa isyu sa sex nga gipasabot kaniya ni Mar. Igo lang siya nga mipahiyom dihang nakadungog sa pagpalabtik-labtik og pulong ni Mar kaniya.

Sa tanto nga pag-unlan-unlan ni Mar sa duha ka paa ni Vivian, wala niya tuyoa nga nakatagpilaw siya. Nahimuot nga nagsud-ong kaniya ang dalaga kay nakahagok g’yud og kadiyot ang radio announcer.

Apan wala ra usab magdugay ang pagtagpilaw ni Mar, nahigmata siya. Daw nauwaw siya kang Vivian. Makapaduka ka g’yud Vian uy, nindot kaayo ka paraygan.

“Pwede ba og mangatulog ta human sa atong pagsuroy sa kabukiran?” nagngisi si Mar, apan nangandoy siya nga dili unta mobalibad si Vivian sa iyang tinguha nga makigpamahuway siya nga sila rang duha.

Daw pinugngan ang pahiyom ni Vivian. “Kuyaw kaayo Mar kun tua na ta sulod sa dapit nga kita na lang duha basin og dili kita makapugong sa atong kaugalingon.”

“Makapugong ka kaha sa imong kaugalingon Mar?,” si Vivian na usab ang misukna ni Mar.

“Pwede ra Vian. Sige I’ll promise, dili ko manglugos kun tua na kita sa bugnaw nga lugar. Ako lang gusto nga makaparayeg g’yud ko nimo’g maayo,” pasabut ni Mar. (Sumpayan)