Tsiks killer

Gula 30

Human malitok ni Mar ang pulong “I Love You” ngadto ni Vivian, mihari ang kahilom sa dalaga.

“Hello, Vian tubaga na ko, Just Tell Me You Love Me,” gipaagi na lang og komedya ni Mar ang pagpanguyab niya kang Vivian. “Hala, kalain ni Kuya Mar,” ingon sa nakaagik-ik ang dalaga, wala kini masuko.

“Sige na Vian, sugta na ko. I Love You,” giusban g’yud ni Mar paglitok ang tulo ka pulong sa pagmahal. Daw naglumpayat sa kalipay si Mar nga nakabati sa tubag ni Vivian sa pikas linya sa telepono. “I Love You Too Mar.”

Gikan niadto, nahimo na nga subsob ang ilang kumunikasyon. Magbanos-banos lang sila pagtawagay. Usa ka Domingo nagkasabot sila nga manuroy ug gikuha ni Mar si Vivian sa ilang balay.

Nagkasabot sila si Mar ug Vivian nga manuroy sa bukid. Sukad-sukad wala gayud makasuroy si Vivian sa bukid. Nanghuwam si Mar og mas power nga motorsiklo gikan sa iyang higala.

Miangkas si Vivian sa motorsiklo sa hinigugma niyang radio announcer ug gisubay nila ang Trans-Central Highway paingon sa bukid. Una nilang giadto ang gitawag og TOPS.

Nalipay kaayo si Vivian dihang didto na sila sa ibabaw. Bugnaw kaayo ang hangin nga mosapigad sa ilang kalawasan bisan og init na ang adlaw kay hapit na ang alas 12 sa kaudtuhon.

Wala pay laing nanuroy didto. Giagbayan ni Mar si Vivian ug gilibot nila ang tibuok dapit sa TOPS. Gikan sa maong dapit makita nila ang kinatibuk-an nga bahin sa Compostela, Liloan, Consolacion, Mandaue, ang isla sa Mactan, dakbayan sa Sugbo lahus na sa Talisay ug Minglanilla.

Nabuhong g’yud ang mga mata ni Vivian. Sa unang higayon gihagkan siya ni Mar sa aping. Mipahiyom si Vivian nga mihangad kang Mar.

Misulod sila sa daw gikwarto-kwarto nga bahin ug nanglingkud. Didto sa ilang gilingkoran dili na sila makita sa mga nagbantay sa canteen ug labaw na sa gwardya sa gate.

Gigakus ni Mar si Vivian, dayon giukoban niya sa unang higayon ang mga ngabil sa dalaga. Lumoy kaayo ang mga ngabil sa dalaga ug daw lumoy usab kaayo ang lawas niini nga iyang nagakus.

Wala magdahum si Mar nga mosukol og hinagkanay kaniya si Vivian. “Basin og may makakita kanato dinhi Mar, mauwaw ta,” matud sa dalaga.

Apan nasayud si Mar nga dili batasan sa mga gwardya nga nagbantay sa gate nga mosuroy sa gikwarto-kwarto nga bahin. Daw langub ang ilang nahimutangan apan walay pultahan.

Mihigda si Mar ug gihimo niyang unlan ang paa sa dalaga. Loving kaayo silang duha. (Sumpayan)