Hinog sa punoan

Gula 32

Nakaamgo si Urielle nga ang kapalaran ug kaugmaon sa iyang pamilya anaa sa ipakanaog niyang desisyon. Mao nga naglisod gayod siya paghukom. Gihigugma niya si Nelson. Apan dili usab mahimong pasagdan lang niyang magkalisodlisod ang iyang mga ginikanan ug mabuktot sa pagbinayad sa ilang utang ngadto ni Don Emilio Archanghel.

“Gisultihan na ako sa amahan mo bahin sa tanyag ni Don Emilio,” nagkanayon si Nang Marciana usa ka higayon niana nga sila rang duha si Urielle sa balay. “Unsa may imong hukom?”

Wala motingog si Urielle. Hangtod niining higayona wala pa gayod siya makapakanaog og desisyon. Daghan ang nakahawid sa pagluwat niya og hukom.

“Sama sa imong amahan,” ni Nang Marciana pa, “miuyon ko sa gitanyag nga kondisyon ni Don Emilio. Ako man gong nakita nga dili daotan ang iyang tumong. Gihatagan lang kita niya’g dakong pabor.”

“Nakasabot ko, Nay,” ni Urielle pa. “Pero lisod kaayo alang kanako ang pagdawat sa maong pabor.”

“Nakasabot ko sa imong bahin, Anak. Nasayod ko nga si Nelson ang imong gihigugma. Apan kun maoy imong palabihon ang gugma ninyo ni Nelson, mag-unsa na man lang kami si Tatay mo? Ikaw mismo nasayod nga maglisod gayod kita pagbayad sa atong nautang ngadto ni Don Emilio.”

Wala na usab makatingog si Urielle. Siya’y naapiki karon sa sitwasyon tungod sa ilang pagkautang ngadto ni Don Emilio. -- Sumpayan pa