Si Asyong napriso na og kinse anyos sa Muntinlupa gumikan sa kasong murder kon sa pagpatay og tawo nga iyang gikalalis sa tubaan ni Tiago Kirat.
Bayente anyos unta to ang iyang sentensiya apan gumikan sa iyang good behavior sa bilanggoan nakapahimulos siya sa "parole" nga gihatag sa gobyerno ngadto kaniya.
Mao tong sa pag-uli niya sa ilaha didto sa bukirang dapit sa Burias, Masbate nahibaw-an niyang bag-ohay pa lang diay namatay ang iyang asawa nga si Pepang gumikan lagi sa konsumisyon tungod sa iyang pagkabilanggo.
"Ay, si Tatay Asyong nakagawas na diay Rosa!" singgit nga nagdala og kasaya ang mga pulong ni Junior nga kamagwangan niyang anak ug karon bayong-bayong na.
Duha ra ka buok ang mga anak nilang Asyong ug Pepang. Milingkod dayon si Asyong sa bangko nga kawayan gawas sa ilang payag ug nagkulokabildo silang magkapamilya.
Usa ka adlaw niana, mibisita kang Asyong ang iyang higala nga si Beloy.
"Bay Asyong, paadtuon ka karon dayon ni Mr. Dy sa iyang resthouse sa lungsod kay may ipatrabaho siya kanimo."
Pilay estorya, miadto dayon si Asyong sa nahisgutang resthouse.
"Dayon, Asyong ug lingkod duol diri nako," timbaya pa ni Mr. Dy kaniya nga dayong yarok sa baso nga bag-o pang giipisan og mahalong bino.
Kini ugod si Mr. Dy usa ka insik nga yutaan ug negosyante usab og kopras sa ilang dapit.
"Nabalitaan nako nga nakagawas ka na gikan sa prisohan. Bilib na kong daan sa imong kaisog ug abilidad sa pag-ihaw og tawo. Walay kwestiyon nianang butanga Asyong," namulong si Mr. Dy.
Naminaw lang si Asyong ug wala gayud siya mosalga sa pagsulti. Mipadayon si Mr. Dy.
"May ipatrabaho ko nimo aron makasapi ka sa dakung kasayun. Likidaha sa madaling panahon si Mr. Lim. Dawata kining beyente mil pesos nga gisulod sa sobre ug ania usab kining pistola. Limpiyo gayud ang pagkatrabaho ug walay sami sami bisan diyutay!" matud pa ni Mr. Dy nga dalang pahimatngon.
"Unsa, ok ka ba?" sukot ni Mr. Dy. Gumikan kay bag-o pa lang siyang nakagawas sa Muntinglupa ug wala gyud siya’y sapi ug diyot gikuha dayon ni Asyong ang sobre nga gisudlan sa salapi lakip na ang armas sa ibabaw sa lamesita.
"Ok, Mr. Dy. Adto nako ug paabota lang unya ang balita," dayong lakaw ni Asyong padulong sa hinuwaman niyang motorsiklo nga gi-parking dili layo sa resthouse. Wala lang damha gikasugat niya si Mr. Lim nga nagmaneho sa bag-o niyang kotse sa usa ka awaaw nga dapit.
Gibirahan dayon niya si Mr. Lim sa walay pupanagana ug kukahadlok niadtong tungora.
"Diyos ko! Unsa ning hitaboa," mao ray katapusang pulong nga nalitok ni Mr. Lim kay maayo man siyang pagkaigo sa iyang agtang ug gumikan niining hitaboa nabangga ang iyang kotse sa usa ka dakung kahoy daplin sa dalan. Patay diha-diha si Mr. Lim nga higpit nga kaaway ug kumpetensiya ni Mr. Dy sa negosyo sa kopras.
Igo lang nakapadagan si Asyong sa gisakyan niyang motorsiklo gikan sa nahitaboan, ug nabangga siya sa usa ka trak de karga sa usa ka likoong dapit sa hi-way. Namatay si Asyong diha-diha. Wala siya makapahimulos sa salapi isip bayad kaniya ni Mr. Dy.
Labaw sa tanan, wala usab siya makahinulsol sa iyang mga sala dinhi sa kalibutan samtang buhi pa siya. Nagabaan si Asyong! (Katapusan)