Sa haysikol pa lang sa ilang lungsod sa San Agustin, barkada na sila si Lolit, Luz ug Mariz. Pulos sila anak og adunahan. Managsamang guwapa, bigot og lawas, husto sa gitas-on ug hamis og kutis. Sa usa ka pagkasulti, attractive sila ngadto sa mga lalaki.
Aduna silay tagsatagsa ka ambisyon. Ug sa ilang panagkita karon sa library sa tulunghaan, gipadayag nila ang ilang damgo sa kinabuhi.
"Someday, gusto kong mahimong doktora," matud ni Luz.
"Well, abogada sab ang akong gusto," mikidhat si Lolit. May kinabuhi ang kinislap sa iyang mga mata.
"Accountant ang gusto nako." Nindot ang pinahiyoman ni Mariz.
Paglabay sa pipila ka tuig, nagtungha na ang managbarkada sa kolehiyo.
Managkalahi ang unibersidad nga ilang gitunghaan, nagpuyo sab sila sa lainlaing dormitoryo. Pero magkon-takay sila sa selpon. Ug kun walay klase ug di sila mamauli sa ilang lungsod, manuroy sila sa siyudad. Mag-malling. Mangaligo sa beach, manan-aw og sine ug uban pang paglingawlingaw.
Hangtod nga nakat-on sila sa paghigugma. Malipayon silang naghinugilon sa kaguwapo sa nahimo nilang hinigugma. Unya nakugang sila dihang gisulti ni Lolit ang ngalan sa iyang boyfriend.
"Unsa?" Nanagko ang mga mata ni Luz. "Tinuod ang imong giingon, Lolit nga Brando ang ngalan sa imong trato?"
"Tinuod lagi." Nahibulong si Lolit.
"Wa ka ba magtiaw, Lolit?" Nataas ang tingog ni Mariz.
"Nagsulti ko sa tinuod, uy. Ngano, nakaila mo kang Brando?"
Nagkadungan pagtando si Luz ug Mariz. Nagtinutokay silang tulo.
"Kun mao, usa ra diay ka tawo ang boyfriend natong tulo!" Nasuko si Luz.
"Ang salbahis! Gilumpong tang barkada!" Masuk-anon sab si Mariz.
"Maayo gani kay nasayran nato ni samtang sayo pa! "Misinta sab si Lolit.
Nagpanglingo silang tulo. Unya nagginaksanay sila. Usa ra ang diha sa ilang hunahuna.
"Di nato ibaylo sa usa ka lalaki ang atong pagkasuod nga barkada," matud ni Lolit.
"Bitaw. Naay daghang laki diha. Magpabilin tang magmahal sa usa’g usa ug padayonon nato ang atong gipangandoy sa kinabuhi," nagkanayon sab si Mariz.
"Buwagan nato ang tadong Brando. Di ta magpada'a sa atong gugma niya."
Nanglabay ang daghang mga tuig. Usa ka adlaw, naglingkod si Luz sa sulod sa usa ka restawran sa uptown. Matag karon ug unya motan-aw siya sa iyang relo sa pulso. Milingi siya sa pultahan sa restaurant. Mapahiyomon siya nga nagtan-aw kang Lolit nga mao pay pag-abot. Mitindog si Luz. Nagbeso-beso si Luz ug Lolit.
Wa madugay nahiabot sab si Mariz. Malipayon silang tulo nga nagkinumostahay samtang nangaon sa lamian ug mahalong mga pagkaon.
"Wa ta mapakyas. Naangkon gyod nato ang atong ambisyon," matud ni Luz. "Usa ka na ka Certified Public Accountant Mariz."
"Yap. Nalipay ko nga usa ka na sab ka doktora, Luz," tubag ni Mariz.
"Bitaw," sal-ot ni Lolit. "Ug ako, usa na sab ka abogada."
"What's next?" Mikidhat si Mariz.
Mibalos sab pagkidhat si Lolit ug Luz kang Mariz. Usa ra ang diha sa ilang hunahuna. Ug nagkasabot sila. Sa wa pa sila manggawas sa restawrant, gilig-on nila ang ilang gikasabotan.
Usa ka Domingo, nahitabo ang usa ka engrande nga triple wedding nila ni Luz, Mariz ug Lolit. Gisuwerte sab sila sa nahimo nilang bana. Pulos buotan ug mga propesyonal. Niadtong adlawa, gibati sa managbarkada ang hilabihan nga kalipay. (Kataposan)