Pagbugtaw sa kaalam

Maslog, Tabogon, Cebu- Sa unang adlaw nga maoy tingbukas sa mga klase sa mga tulonghaan sa elementarya ug sekundarya, nagdasok na diha sa lawak saringan sa greydwan, ang mga kabataan nga buot motungha.

Nagkapuliki gani si Miss Breena Bughao, nga maoy maestra sa greydwan sa pagpanglista sa mga ngalan sa bata nga bag-ohay palang nga nagpalista. Nalista naman god ang uban niadtong panahon sa tingbakasyon. Kay duna may gipahigayon nga pagpanglista.

Usa sa mga nalista ni Miss Bughao mao si Andoy. Ug nagpangidaron na gani kini’g kinsi ka tuig. Nga manghod lang gani og mga unom ka tuig ni Miss Bughao.

Gawas sa kadako na niya’g edad, taas usab nga pagkatawo si Andoy. Gani, miabot man og mga lima ka tiil ug pito ka pulgadas ang gitas-on niini. Ug taas pa gani kaayo kini kay sa ilang maestra nga si Miss Breena Bughao.

Sa sinugdanan morag mahimuot kaayo ang mga klasmeyt ni Andoy nga magtan-aw kaniya. Ilabi na, kay kanilang tanan nga mga eskuwela ni Miss Bughao, siya ray magbuntaog diha sa ilang lingkoranan.

Apan sa kadugayan, naanad nalang ang mga klasmeyt ni Andoy og tinan-aw kaniya. Gipakasama nalang siya nga sama ra usab kanila. Gani, nakat-on naman sila sa pakighugoyhugoy kang Andoy. Ilabi na kay maayo usab kaayo si Andoy kanila.

Sa iyang bahin, bisan pa man og salikwaot kaayo ang kahimtang ni Andoy diha sa sulod sa ilang lawak-saringan, labi na kay siya ray labing dako’g edad, ug mao usay kinadak-an sa tanan apan wala lang niya kini igsapayan.

Ug wala usab niya ikaulaw kining pagtungha niya sa greydwan. Kay mao man lagi nagdako sa iyang hunahuna nga makakab-ot gayud og kaalam. Gusto man gud siyang makatapos sa pagtuon, bisan kutob nalang sa hayiskol.

Kun hunahunaon gani, tingalig ikaupat na kining higayon nga nagpalista siya sa greydwan. Katulo naman gud ka higayon nga nakaundang sa pag-eskuwela si Andoy. Maong wala usab siya makatapos sa greydwan. Hangtod nalang gani nga miabot nalang si Andoy sa iyang pangidaron karon.

Niini hinuong higayona, morag malaumon kaayo si Andoy nga matuman gayud ang iyang mga pangandoy sa kinabuhi. Nga mao ang pagkab-ot sa kaalam. Ilabi na kay may mga tawo na gayud nga mipasalig nga motabang kaniya aron makadapayon siya sa iyang pagtuon.

Nakaagawon man gud si Andoy og mga maayong tawo. Nga wala say anak. Ug mao kini ang mipasalig nga tabangan siya aron makapadayon siya sa pag-eskuwela. Bisan pa gani hangtod na sa kolehiyo.

Tungod sa maong pasalig misamot usab ang kadayig ni Andoy sa pagtuon. Matinud-anon kaayo siyang nagsunod sa matag leksyon sa ilang maestra. Ug malaumon kaayo siya nga moabot ra gayud unya ang higayon nga matuman gayud ang iyang mga damgo. (Kataposan)