Anino sa Kulto

“Nanghulga siya nako. Apan dili kana ang importante kong itaho nimo.”

“Unsa man diay?”

“Ang bahin sa iyang pagka-tawo.”

“Unsay buot mong ipasabot?”

“Tinuod ang gitug-an ni Annabelle Castro kanato, Dick. Usa gayod ka babaye ang supremo sa Tambayawan.”

“U-unsa?”

“Mao kana, Dick.” “Ingon sa dili gayod ako makatuo nga usa ka babaye ang supremo sa kulto. But I can give you the benefit of the doubt kay mao kana ang gitug-an ni Annabelle Castro kanato. Gawas pa, makapamatuod ka na niini kay nagkasulti man kaha kamo sa cellphone. Kana lagi kun siya gayod kadtong imong gikahinabi.”

“Nakaseguro kong siya gyud, Dick,” mipamatuod si Carlo. Dili ra siya layo kanako dihang gikontak niya ang akong cellphone. Nagsakay siya og motorsiklo ug nagmaskara. Nagpaatbang siya sa akong nahimutangan. Ang ako lang gikahibudngan kun nganong nasayod siya sa numero sa akong cellphone.”

“Dili kana ikahibulong, Carlo,” matud sa hepe. “Ang usa ka tawo nga may interes kanimo mangita gayod og paagi nga masayran niya ang mga butang nga buot niyang mahibaloan bahin kanimo.

Nahilom si Carlo. Gihinuktokan niya ang gisulti ni Maj. Campo. “Imo bang nakuha ang numero sa iyang cellphone?” nangutana si Maj. Campo pagkilab sa pipila ka daklit. “Nalimtan nako pag-save,” tubag ni Carlo nga mibatig kahinugon. “Apan masubay ko pa ang iyang numero sa call register sa akong cellphone. Irehistro ko unya kini.” “Ingon sa isog ra usab kaayo kining babayhana,” matud sa hepe, “nga nakahimo pagbarog isip supremo sa kulto. Dili kana usa ka ordinaryong butang. Dili kana tiawtiaw lang.”

“Bitaw, Dick,” uyon ni Carlo. “May talagsaong kaisog ang maong babaye. Bisan gani ako nakadayeg kaniya. Naghinamhinam na hinuon ko pag-ayo nga ako siyang mailhan.” -- Sumpayan pa