Giluwas si Minda sa batang kulot

Dihang namatay si Inse Tomasa si Felisa na lang ang nag-inusarang nagpuyo sa ilang balay. Ang ilang balay nahimutang sa hanayhay nga bahin sa balangay.

Kun panahon sa gabii butangan gyud ni Felisa og lamparilya ang ilang pantawan, kay matud pa niya mahadlok kuno kining maghunahuna nga siya rang usa ang matulog sa ilang balay.

Hinuon, duna man siya’y kaubang iring ug usa ka iro. Pero, gibati gyud og kahingawa ang iyang ig-agaw nga si Tording nga susama ra pud niya’g pangidaron.

Gani, kapila na si Felisa agdaha nga adto na lang matulog sa ilang balay panahon sa gabii ug sa buntag na lang kini mopauli sa ilang balay.

Apan midumili si Felisa nga sa katarongan wala’y manghilabot kaniya kay bantayan kuno siya sa kalag ni anhing nanay niya Tomasa.

Duna man pud sila’y imahen ni Senyor Santo Niño nga dumdumon pud ni anhing Inse Tomasa sa buhi pa kadto siya matag abot sa bulan sa Enero sa Bag-ong Tuig.

Human sa siyam ka adlaw nga nobenaryo magpista gyud si anhing Inse Tomasa ug ang iya ra sang mga kadugo ang iyang imbitahon.

Ug karon nga patay na si Inse Tomasa nakahukom si Felisa nga iyang padayonon ang paghatag og pangilin sa gamay’ng imahen ni Senyor Santo Niño. Ug nakauyon pud si Tording nga dili gyud biyaan ang pagpahinungod sa batang balaan matag Enero.

“Dili lang ko mohigda sa inyoha, Gaw, uy,” ni Felisa pa. “Basin og duna unya’y kawatan og lungkabon ang among balay. Maayo nang naa ko sa among balay kay makapanawag man ko’g tabang o singgit sa pakitabang kun dunay dautang tawo nga buot mosaka sa among balay.”

“Aw, ikaw gud, Gaw. Ubanan ta unta ka, pero, dili nako kabiyaan si tatay Damian nga may sakit sa hubak,” pahayag ni Tording.

Pagkasunod gabii, nabati na pud ni Felisa ang wakwak ug gikaskas ang ilang atop. Mikurog si Felisa ug way mga pulong nga nanggawas sa iyang baba. Dinhi sa ilang baryo may pamilya nga gidungog-dungog nga mga kaliwat og ungo ug kini sila mao ang pamilya Bukog. Si Paulino Bukog maoy unang nadungog nga nangabat ug namalbal sa may karaang atabay didto sa bungtod ug dayon misunod ang iyang asawa nga si Antang nga sigahon kaayo’g mga mata.

“Wakkkkkk! wakkkkkk! wakkkkkk!” Ug nadungog ni Felisa nga gikaskas ang ilang bungbong dapit sa kusina. Taudtaod ingon sa dunay buot moabli sa pultahan apan may kandado kini. Sunod nga mga gutling maoy giablihan ang bentana. Naabli kini ug maoy nakita ni Felisa ang usa ka lalaki nga nagbatog na sa may inablihan nga bentana. Laksot kaayo’g nawong. Tag-as og bangkil dihang mitingsi kini ug siga kaayo ang puwa niining mga mata. Namay-ongan ni Felisa nga si Paulino kini kay nakaila man siya niini. Moagi kini kanunay sa karaang atabay kanang manglaba siya.

“Sa ngalan sa Ginoo, ayaw tawon ko’g hilabti, Noy Paulino.” Milanog ang tingog ni Felisa. “Nakaila baya ko nimo.”

“Gusto ko’g dugo sa usa ka babayeng dalaga nga sama nimo, heeeeee, he, he, he, he Wakkk! Wakkkk!” Milukso ang ungo paduol kang Felisa nga mipabitay sa taas niining dila. “Hmmmm....kalami sa lab-as mong dugoooooo, yeeeeeee!”

Napiyong ni Felisa ang iyang mga mata sa kalisang dihang buot na siyang hasmagan sa mangtas nga si Paulino. Apan may bata nga kulot og buhok nga kalit lang mipatunga, ug ambot diin gikan kay daw kilat man kining mitumaw. Giisa niini ang tuong kamot ug gitudlo daw tulisok ang mangtas nga si Paulino. Miatras si Paulino nga ingon sa nalisang ug unya miaso ang buhok ug nawong nga ingon sa napaso.

“Ayaaayyyyyy! Yeeeeeee! Wakkkkkkkk! kasakittttt! Nasunoggggg koooo!” Ug miambak kini lahos sa bentana ug wala na mopatim-aw pa. Nagpasalamat si Felisa sa Batang kulot. (Kataposan)