Anino sa Kulto

Misanting ang mga dalunggan ni Carlo. Ingon sa gipalagot siya’g maayo sa babaye nga nanawag kaniya.

“Hoy!” ni Carlo sa inggit nga tingog. “Kun kinsa ka man, maayong masayod ka nga wala ko mahadlok nimo. Kun akoy imong tuyoan, pakita nako.”

Mikatawa ang babaye. Ingon sa nagbiaybiay kang Carlo. Nanginit na pag-ayo ang sekreto. Mora’g misaka ang tanan niyang dugo sa iyang tangkugo.

“Lingi sa imong luyo, Mr. Guieb,” nagkanayon ang babaye, “kun gusto mo akong makita.”

Kalit nga nahalingi si Carlo dapit sa luyo sa iyang sakyanan. Wala siya’y nakitang tawo. Apan didto sa unahan may nalantawan siya. Nasangit ang iyang panan-aw sa usa ka motorsiklo nga nag-urong nga gisakyan sa tawo nga nagmaskara. Nag-urong kini duol sa poste sa elektrisidad mga kalim-an ka metros sukad sa nahimutangan sa iyang sakyanan.

Dihadiha gilanit ni Carlo ang .45 kalibreng pistola gikan sa iyang hawakan dungan ang pag-abli sa pultahan sa walang kilid sa awto. Nanaog siya sa sakyanan. Igo pa lang midapat ang iyang mga sapatos sa sementong karsada, ang motorsiklo midali pagpalayo. Mihana siya’g gukod niini dungan ang pagpasalba sa iyang armas. Apan ang motorsiklo misutoy palayo hangtod nga wala na niya kini makita. Nagpaminti siya sa kalagot.

Mibalik si Carlo sa nahimutangan sa iyang sakyanan nga nagpamaak pa sa iyang mga ngabil. Gibalik niya pagsuksok ang .45 kalibreng pistola sa iyang hawakan. Milingkod siya sa atubangan sa manibela nga nagpunay og pangusmo.

Ang langgam nga kaganina idlas nga misapigad sa iyang kaisipan karon mibalik paglakdop ug mibatog na gayod. Dihay iyang nahinumdoman. Sa wala pa patya si Annabelle Castro, nakatug-an kini kaniya nga ang supremo sa Tambayawan Black Brotherhood usa ka babaye. Dili kaha nga kadtong babaye nga iyang gikasulti sa cellphone dili pa lang dugay mao ang supremo sa kulto? - Sumpayan pa