Payts bisag lupig

Taho....! Taho....! Tahoo...!" milanog ang singgit ni Dexter nga nagsinangay sa dakong baro sa taho ning hapona. Mikayod na usab siya sa pagsuroy taman sa ginhawa aron lamang nga madako-dako ang iyang kinitaan matag adlaw, ilabi na nga nagsabak na ang iyang asawang si Cita sa una nilang liwat.

Ikaduhang baro na niya kining gisuroy ning hapona sa lamiang taho gikan sa factory ni Sir Pat Georsua, nga maoy tag-iya sa pagamaan og lamiang templada nga taho sa tibuok siyudad. Gikan sa kaadlawon ug hangtod na sa alas diyes sa buntag, maoy unang pagsuroy og taho ni Dexter.

Unya, gikan sa ala-una sa hapon ug hangtod na sa alas-sayis sa hapon, mao ang ikaduhang tirada sa pagpanuroy niya sa lamiang taho, sa bisan asang barangay nga iyang makursonadahan.Usa lang ka taho vendor si Dexter, apan labing menus, molimpiyo siya og tag-kinintos pesos ang adlaw, way labot sa pakapin kaniya ni Sir Pat Georsua.

"Aron mahaw-as ta’s kalisod, Bay Dex ug maharuhay sab ta, kinahanglan sab nga mosayidlayen ta’g negosyo aron moasenso....!" mao kini ang kanunay isulti ni Johnny kang Dexter, kauban niyang taho vendor. Apan lahi nga pagamaan og taho ang angkatanan ni Johnny sa siyudad. Dili siya taho vendor ni Sir Pat nga maoy agalon ni Dexter.

"Aw, payts bisag lupig lang gyud ko ini, Bay John, bahala nag way sayid-layen nga negosyo! Kayod lang gyud ko’g panuroy og taho kay mao man ni ang gisaligan kong trabaho...!" tubag ni Dexter ngadto kang Johnny kanang mag-abot sila sa usa ka kalye sa siyudad.

"Basta kun gusto kag sayid-layen nga negosyo sama nako, ingna lang nya ko, Bay Dex! Kay ipaila-ila tika sa akong Boss...!" tugon ni Johnny kang Dexter.

"Usbon ko, Bay John, payts bisag lupig na lang gyud ko ining akong pagka-taho vendor! Kontento na ko ubos sa pagdumala ni Sir Pat Georsua!" lig-on nga tubag ug baruganan ni Dexter sa iyang pagka-taho vendor.

May namatikdan gyud hinuon si Dexter kang Johnny. Hilabihan ka paspas ang pag-asenso niini. Nakapaayo na siya sa iyang balay sa Camputhaw ug daghan na nga appliances ang iyang napalit ngadto sa iyang asawa ug mga anak.

Kalit nga napahunong si Dexter sa iyang pagsinangay sa dakong baro sa taho ning hapona. Sa usa ka eskina sa V. Gullas Street, daghang mga tawo nga nagpundok. May patrol car sa mga polis usab nga nag-parking sa daplin sa dalan. Unya, maoy nasugat sa panan-aw ni Dexter nga giposasan si Johnny sa mga polis ug gipasakay sa patrol car uban ang gisinangay niyang baro.

"Sus, pantalya man lang diay ang pagka-taho vendor anang tawhana! Shabu pusher man diay nga nalutsan na’g warrant of arrest...!" klaro nga nadungog ni Dexter ang gipamulong sa niwang nga lalake nga diha sa alirong.

Nakapanglingo si Dexter nga milakaw ug misinangay sa iyang baro sa taho. Karon, natugkad na niya ngano nga paspas ang pag-asenso ni Johnny. Hilom siyang nagpasalamat sa Ginoo nga wa gyud siya mokubit sa gitanyag kaniya ni Johnny! (Kataposan)