GULA 98
Ang mga impormasyon nga nakuha ni Carlo gitaho usab niya ngadto ni Maj. Campo. Mituman siya sa ilang sabot nga magsayranay sila sa mga impormasyon nga ilang mapupho gikan sa lainlaing mga tinubdan. Si Maj. Campo mitug-an usab kaniya sa mga kasayoran nga nahipos niini. Hilom siyang nahimuot sa pagdigahay na nila’g mga kasayoran. Iyang nasuta nga mas dako siya’g agi sa imbestigasyon kay sa hepe. Diyotay ra ang mga kasayoran nga gikahatag sa hepe kaniya, ug alang kaniya dili usab balido ang tanan. Bisan pa man iya kining gikahinangop.
Apan ang problema nga giatubang ni Carlo ug sa kapolisan sa lungsod sa Mabini nadugangan nga wala nila damha. Usa niana ka buntag, mao na lamay ilang nabalitaan nga gipatay si Annabelle. Ang mga manghod sa biktima nga nakasaksi sa hitabo mitug-an nila ni Carlo nga ang tulo ka mamumuno misulod sa ilang balay nga pulos nagsul-ob og maskara. Wala makaila ang mga igsoon ni Annabelle sa mga mamumuno. Giseguro na lang sa kapolisan ang paghatag og proteksyon sa duha sa kahadlok nga balikan kini sa mga mamumuno.
Mibatig dili tiaw’ng kahinugon si Carlo sa kamatayon ni Annabelle. Gikinahanglan niya si Annabelle sa higayon nga mataral na niya ang supremo sa Tambayawan ngadto sa hukmanan. Ang mga testimonya unta ni Annabelle maoy mopahimug-at sa kaso nga iyang ipasaka batok sa pangulo sa kulto. Apan demalas...gipahilom si Annabelle sa mga disipulo sa Tambayawan.
Sa tinguha nga masulbad ang kaso, si Carlo naglihok sa adlaw’ng tanan. Gipadayon niya ang pagtigom og mga kasayoran mahitungod sa Tambayawan Black Brotherhood. Bisan unsa na lang ang nahunahunaan niyang buhaton nga may kalambigitan sa gihimo niyang imbestigasyon.
Kanunay siyang nakigkita ni Maj. Campo. Maoy kanunay nga pabilo sa ilang panagkabildo ang kaso nga ilang giatubang. Nagtambayayong sila pagtakdo-takdo sa mga posibilidad. Sama kang Carlo, dako usab ang tinguha ni Maj. Campo nga masulbad ang mga krimen nga nahitabo sa lungsod sa Mabini. -- Sumpayan pa