Anino sa kulto

GULA 97

Nasuta ni Carlo nga kulang pa ang nahipos niyang mga impormasyon. Kinahanglang mogamit siya’g inutok nga pukot aron pagbaling sa dugang pang mga kasayoran. Matag abot sa higayon, magadugang ang iyang kasibot sa pagpalawom sa iyang imbestigasyon kalabot sa kultong Tambayawan.

Gipakigkitaan niya si Ben Cadigal, ang ilang silingan nga gitumbok ni Maj. Campo nga maoy nakakita sa awtong itom nga gisakyan sa mga tawo nga nagrapido sa ilang balay. Usa diay ka barangay tanod si Ben Cadigal ug nagrobing kini atol sa nahitabong pagpangrakrak sa ilang balay. Gikuhaan niya kini og pamahayag.

Gipakigkitaan usab niya ang mga ginikanan sa duha ka batang babaye nga gipatay. Gisukitsukit niya sila. Gipunpon niya ang ilang mga pamahayag.

Maoy ulahi niyang gipakigkitaan ang mga anak ni Dr. Castro. Diyotay ra ang gikaasoy sa duha sa tulo ka managsoon nga pulos babaye. Si Annabelle ra dudaghan ang gikasulti. Mas komprehensibo ang mga kasayoran nga gibutyag ni Annabelle kaniya.

Gitigom niya ang tanang mga kasayoran nga iyang nahagdaw gikan sa mga tawo nga iyang gikahinabi. Iyang hashasan ang mga impormasyon nga iyang nakutlo. Iya kining hagpatan sa mga tipasi aron mao na lamay mahibilin ang timgas nga kamatuoran nga iyang ikadugang sa mga kasayoran nga nahisaling-it na sa iyang kaisipan nga giisip niyang balido ug mahinungdanon nga sarang magamit sa pagpiga unya niya sa mga tawo nga buot niyang pit-on.

Usa sa giisip ni Carlo nga materyal kaayo nga kasayoran nga iyang napugnitan mao ang iyang nakuha gikan sa pamahayag ni Annabelle. Kini ang bahin sa supremo sa kulto. Sumala kang Annabelle, babaye ang supremo sa Tambayawan. Gikasulti na kini ni Annabelle sa telepono ug natino niya sa tingog niini nga usa gayod kini ka babaye. -- Sumpayan pa