Namasko si Segundina mangtas

Nahibalik si Mayor Facundo sa pagka Mayor sa ilang lungsod dihang iyang giparot ang iyang kaatbang nga si Mayor Romano. Ug daghan ang nangalipay kay lagi maayo mang modala sa iyang lungsod si Mayor Facundo.

Niadtong naparot siya ni Mayor Romano daghang naguol kay lagi maayo mang tawo si Facundo ug nasayran sa mga katagilungsod nga gitikasan diay si Mayor Facundo ni Mayor Romano. Maayong laki sa panikas si Mayor Romano kay anad sa sugal.

Sugarol kini si Mayor Romano ug dihang miabot na sab ang sunod nga piniliay human sa tulo ka tuig nga nagpakahilom daw sama sa mga layang sagbot nga giharos ni Mayor Facundo ang matag Presinto ug luoy kaayo si Romano kay wala magsilbi ang iyang pagka tikasan kay nabantayan na kini sa mga dumadapig ni Mayor Facundo. Usa sa nalipay pag-ayo mao si Segundina, ang biyuda ni Konsehal Gaspar.

Maayong tawo usab kadto si Konsehal Gaspar apan way suwerte kay namatay sa sakit sa atay. Apan daghang nag-ingon nga dili kuno sakit sa atay ang namatyan niini kundili napusilan kuno kini didto sa lungsod sa Pulang Rosas kay nangabat. Mao man goy pagtuo nila nga si Konsehal Gaspar natakdan na sa iyang asawa nga si Segundina nga gidungogdungog nga maoy midawat sa pagka ungo sa iyang inahan nga si Uray Masay.

Ug duna gani nakakita nga nagtuwad si Segundina sa may punoan sa tambis duol sa ihawanan og baboy ni Ingko Toribio. Ug may gibalbal na kuno kini didto sa laing balangay.

Ug karon nga miabot na ang Pasko batasan gyod ni Mayor Facundo nga kinsa kadtong moadto sa munisipyo ug unya mangayo kaniyag Pinaskohan iya gyong hatagan. Dato man sad god si Mayor Facundo kay dunay dakong negosyo sa dakbayan ug ingon man didto sa Kaulohan. Ning buntaga sa Pasko nindot kaayo ang awit sa mga mananaygonay ug mananoy usab kaayong pamation ang mga Paskohanong awit nga gidalit pagtugtog sa mga radyo diha sa mga kasilinganan. Ug samtang nag-inusarang nag-atiman si Mayor Facundo sa mga dokumento nga angay sa iyang pagpirma, gisangpit siya’g hinay sa iyang private secretary nga mituktok una mosulod.

"Si...si Segundina, mayor," ni Bosyong pa.

"Segundina? Kinsa mang Segundinaha, daghan ra bang Segundina ang pangalan nga nia dinhi sa atong lungsod, Bosyong."

"Ang biyuda ni Konsehal Gaspar, Mayor."

"Mao ba, sige, Bosyong, pasudla."

Gipasulod ni Bosyong si Segundina. Nangatahoran kini sa mayor. Unya way lipodlipod kining misulti sa iyang tuyo. "Nia lagi ko, mayor, kay mangayo ko nimo’g pinaskohan..."

"Kana ra diay ang imong tuyo nako, Segundina," ni Mayor Facundo pa. "Abi nimo, buotan kaayo to nako ang imong bana nga si Konsehal Gaspar, busa, dili gyod ko malimot kaninyo, Segundina. Sige lang, kay ugma ipahatod nako ang pinaskohan..."

Nalipay ang biyuda. Tuod, nianang pagka ingon ugma, si Mayor Fernando gyod ang nangunay paghatod sa pinaskohan didto sa balay sa biyuda.

"Salamat kaayo ini, ha, mayor?" ni Segundina pa.

"Sige, ablihi ang putos aron masayod ka kun unsa kanang akong pinaskohan kanimo," matud sa Mayor.

Giablihan dayon ni Segundina ang putos. Ug dinhi ingon sa nahasiga ang mga mata ni Mayor Facundo nga mitutok kang Segundina. Ug nanagko usab nga ingon sa nahadlok si Segundina pagkakita sa sulod sa giablihan niya nga putos.

"Ayyyy, di...dili ko...dili ko ini, uy, mayor .... suwawwwww kaaayo na nakoooo, heeeee!" Ug mitindog si Segundina nga nagkurog. "Usa ka krusipiho ang imong pinaskohan nako, mayor."

"Oo, Segundina, ug karon, motuo na gyod ko nga ungo ka diay ug ako nagtuo ikaw ang mipatay sa akong asawa, imong gibalbal ... imong gibalball ....angggg ... ang akong asawaaaaa!!" Milanog ang tingog ni Mayor Facundo nga gigamhan na sa kalagot. Midagan si Segundina paingon sa silong. Sa gawas sa munisipyo, lanog kaayo ang alawiton sa Pasko. (Kataposan)