Hinog sa punoan Gula 14

Dinhi ka lang.” Nagkanayon si Noy Sidro. Bantayi pag-ayo ang imong inahan.”

Niana dayong adlawa mibalik si Noy Sidro ngadto sa Tuburan. Maoy tuyo sa amahan ni Urielle ang paghangyo kang Don Emilio Arcanghel nga pahuwamon sila’g dakong kantidad sa salapi nga gikinahanglan sa pagpatambal kang Nang Marciana.

Si Urielle maoy nahibilin sa tambalanan aron pagbantay sa iyang inahan. Si Raymond atua ra sa Tuburan, nagpabilin aron maoy makaatiman sa ilang hayopan, ilabi na sa kabaw nga igdadaro sa ilang amahan.

Sa hilom nangaliya si Urielle nga unta molampos ang iyang amahan sa tuyo niini ngadto ni Don Emilio. Wala na sila’y laing gilauman gawas sa panabang niini. Kun mobalibad si Don Emilio sa pagtabang kanila, wala na gayo’y paglaom nga matambalan si Nang Marciana. Magpabilin na gayod kining bedridden hangtod sa kataposan sa kinabuhi niini, butang nga dili buot mahitabo ni Urielle.

Takulahaw lang nahitungha si Nelson sa tambalanan. Nakugang pag-ayo si Urielle pagkakita sa hinigugma nga misulod sa ward nga nahimutangan sa iyang inahan. Naatol nga natulog si Nang Marciana sa paghiabot ni Nelson.

“Giunsa mo pagkasayod sa nahitabo?” Sukit gilayon ni Urielle.

“Didto ko sa inyo,” ni Nelson pa. “Si Raymond ang nagsulti nako nga gidala ninyo si Nang Marciana dinhi sa siyudad.” -- Sumpayan pa