Bisan lunok nalang ang malana

Kaadlawon pa gani namukaw na si Eser, ni Nanay niya Noring, nga nagkanayon: "Bahala na lang Nay Noring, kun maminyo ako nga tiguwang, bisan lunok na lang ang malana!"

Gialimungawan si Nanay niya Noring, nga taudtaod na usab nabiyuda ni anhing Masyong.

Sa panuigon god nga kan-uman ug siyam ning pagka-dalagang guwang ni Eser, ingon man og silaban sa kainit ang iyang bilahan, ilabi na sa panahon sa iyang kabatan-on nga dalaga ... wa gayod siya makatilaw og kalami nga gidigamo og usa ka lalaki.

Hasta makapila niya pil-a karon ang pagbasul, kun ngano gayod nga wa niya sugta si Miyong, nga kursonado ra ba unta nga makigminyo kaniya?

Wa lang tuyoa nanumbaye sa may gingi sa iyang panumdoman ang katam-is sa pulong ni Miyong kaniya, nga sobra pa nga gikamayan diin kini nagkanayon:

"Palabihon ko pa Eser, nga magpabilin ako nga ulitawong guwang kay sa mangita ako og laing babaye, nga dili makapapitik sa akong kasingkasing ... aron akong higugmaon!"

Wa lang tuyoa nakahilak si Eser nga mao rang usa. Ngano gayod nga ang katim-os ug ang katiunay unta sa gugma kaniya ni Miyong, iya man nga gisalindot ug giyam-iran?

Gani, sa panahon nga mamisita kaniya si Miyong, sa ilang pinuy-anan, iya man dayon kining abogon sa pagpakanaug, kay lud-on siya nga magsud-ong sa maong lalaki nga dili tipo sa iyang kagustohan?

"Prangkahan tika Miyong, bisan gamay na lang pitik sa akong kasingkasing ... dili gayod makat-on nga mopitik aron ikaw akong higugmaon?" hapit nalang niya itukmod sa may hagdanan si Miyong aron pakanaugon.

"Sa unsang katarongan Eser, nga dili gayod mahitabo nga imo akong higugmaon sa kadalisay sa akong gugma kanimo?" Naghilak si Miyong nga nagpakisayod.

"Tungod kay ang tipo sa imong hitsura Miyong ... dili bagay sa akong kagustohan!" prangka nga gidaygan ni Eser.

Tuig nangahulpa sa pagpanglabay. Giatngan ni Eser, sa may simangan nga dalan si Miyong, nga nagpalunang og kabaw, diin iyang gigakos og hugot kaayo.

Nakalitan si Miyong ug nagkanayon.

"Unsa god ning hitaboa Eser ... nga gigakos mo man ako sa pag-ayo?"

Nagpanglad-ok og laway si Eser ug nagkanayon:

"Magpakasal kita karon dayon Miyong ... bisan lunok na lang ang malana kanatong duha nga pulos na tiguwang!" (Kataposan)