Hinog sa punoan

Wala magmakuli si Don Emilio Arcanghel sa pagpahulam og kuwarta kang Noy Sidro mao nga nadala gayod nila si Nang Marciana sa tambalanan. Ang mga doktor sa tambalanan sa lungsod sa Tuburan mibalibad pag-atiman sa sakit ni Nang Marciana tungod sa kakulang nila sa kahimanan.

Mirekomendar ang mga doktor nga dad-on si Nang Marciana ngadto sa dakbayan sa Sugbo. Wala maglangan sila si Urielle. Gidala gilayon nila ang iyang inahan sa siyudad aron kini patambalan.

Sa Don Vicente Sotto Memorial Medical Center, gipailawom si Nang Marciana sa makuting eksaminasyon. Lisod sabton ang sakit sa inahan ni Urielle. May mananambal nga nagtuo nga ang nahitabo ni Nang Marciana maoy resulta sa pagsaka sa presyon sa dugo. Pero lahi usab ang findings sa laing doktor. Hangtod nga naglibog na hinuon sila kay ang mga tambal nga gidapat pulos man wala moepekto ngadto sa pasyente.

Nabalaka na pag-ayo si Urielle. Unsa man kaha gayod ang sakit sa iyang inahan nga naglisod man ang mga doktor sa pagtumbok sa sakit niini?

Sa kataposan, gipailawom si Nang Marciana sa labing makuti ug mas masangabon nga matang sa eksaminasyon. Samtang naghulat sila si Urielle sa gawas sa lawak diin gieksamin ang iyang inahan, nag-ampo siya sa hilom nga unta madiskubrehan na sa mga mananambal ang lintunganay sa sakit nga gipamatyag sa iyang inahan aron kini kadapatan sa tukmang tambal. -- Sumpayan pa